Заборавете на компјутерите и телевизорите, топло облечете се, ставете насмевка и уживајте во зимска авантура.
Искористете ги снежните денови за семејно дружење, рекреација и уживање. Децата се на распуст, па сега е вистинското време да им се посветите повеќе, а спортот и рекреацијата во природа ја зајакнуваат семејната врска. Доколку не сте во можност да отпатувате на планина, посетете го градското лизгалиште или санкајте се со најмладите на најблискиот снежен рид, каде се уште се задржала зимската покривка.
Снегот се топи, но по високите места се уште има доволно за уживање, спортски активности и правење на снешко. Во големите градови има отворени лизгалишта што секојдневно ги посетуваат голем број на деца со родители, а добрата забава на мраз е загарантирана.
Прстојот на свеж воздух на сите ќе им одговара, ќе ги размрдаат мускулите и ќе го поправат расположението, а сигурно и добро ќе се чувствувате кога ќе се вратите дома, ќе се замотате во топло ќебе и со најблиските ќе ги раскажувате интересните моменти од убавиот зимски ден.
