Украинскиот претседател Володимир Зеленски изјави дека победата на Украина против Русија ќе го промени светот и ќе ги запре идните агресори. Зеленски оваа изјава ја дал во своето денешно обраќање пред британските пратеници во Лондон.
„Победата ќе го промени светот и тоа ќе биде промена која на светот долго му требаше“, рече Зеленски, кој е во прва посета на Велика Британија откако Русија ја нападна Украина на 24 февруари минатата година.
„Обединетото Кралство оди заедно со нас до најважната победа во нашите животи, тоа ќе биде победа над самата идеја за војна“, рече Зеленски.
Претседателот на Украина инсистираше да се набават борбени авиони за да се обезбеди победа на неговата земја над Русија.
Тој, исто така, изрази благодарност до британскиот народ за поддршката од првиот ден против инвазијата на Москва.
МИА
