Скопје, 25 декември 2021 (МИА) – Сојузот на борците на премиерот Зоран Заев му врачи Повелба за долгогодишен и успешен придонес во поддршката и соработката со Главниот одбор на Сојузот и негово издигнување на достоинствено државно ниво.
Истакнувајќи дека е особено горд и благодарен што еден од неговите последни јавни настапи како претседател на Владата е средбата со претставниците на Сојузот на борците, премиерот Заев потенцира дека како член и продолжувач на традициите на слободарското антифашистичко движење и нивното наследство, останува неговата свечена обврска за понатамошна афирмација на големото, историско дело на храбрите борци на НОБ.
„Гордоста е голема, но честа и денеска да бидам со вас е уште поголема. Уште повеќе, кога во година кога го одбележуваме значајниот јубилеј 80 години од Народното востание и секако 73 години од основањето на Сојузот на борците и сето тоа во рамките на 30- годишнината од независноста на нашата држава. Во бурни времиња на светската историска сцена вие презедовте историска улога. Препознавте дека пред вас е момент, кој не смее да биде пропуштен. Кренавте антифашистичко востание и ја поведовте Националната ослободителна борба, од која се роди и нашата држава. Држава, што на нејзината цел ја доведоа мажите и жените, припадниците на партизанските одреди на Народното антифашистичко ослободително движење“, истакна премиерот Заев во своето обраќање на вчерашната средба со претставниците на Сојузот.
Упатувајќи искрена благодарност, за подвигот и остварувањето на непроценливото дело, односно македонската државност на генерацијата која го оствари вековниот стремеж и сон на многу претходни генерации, Заев на борците и борките и поддржувачите на нивното дело, им порача дека како премиер, секогаш настојувал овие средби да не бидат само формалност и протокол.
„Јас не можам да дозволам вашето дело, наследството кое што ни го оставивте да бидат одбележувани само како формалност. Секоја средба со вас мене ме инспирираше да си поставувам прашања: Како да го зачуваме она што го наследивме и како од Северна Македонија да направиме подобра држава, поубаво место за живеење? Како да направиме чекор повеќе во освојувањето на слободата за сите наши граѓани? Такви прашања и насоки инспирира вашето дело“, рече премиерот Заев.
Тој нагласи дека како резултат од подвигот на борците од НОБ, денес ја имаме Република Северна Македонија, меѓународно призната држава со сите постулати на државност, членка на Обединетите нации, членка на НАТО пред чие седиште во Брисел се виори македонското знаме и никој веќе не може да го оспори македонскиот јазик и македонскиот идентитет како посебност, автентична за овој народ и за оваа држава.
„Да завршам со голема благодарност. Нѐ задолживте со голем дар, голема чест. Вашето дело заслужува длабок поклон и чест ми е да го продолжувам вашето дело кое за мене е аманет борбата против фашизмот и за праведно општество никогаш да не запре. Ви благодарам на сите за честа што ми ја укажавте со ова признание“, истакна Заев, додавајќи дека тој и двете Влади што ги предводеше, останаа посветени на поддршката на Сојузот на борците во негувањето на традициите и на светлите датуми од Народноослободителната борба за зачувување и чествување на остварувањата од кои се роди македонската државност.
Претседателот на Главниот одбор на Сојузот на Борците од НОАВМ 1941-1945 и граѓаните поддржувачи, Никола Стојановски на средбата врачувајќи му ја Повелбата за повеќегодишната посветеност, поддршка и соработка со Сојузот на борците, на Заев му посака да продолжи соработката меѓу Владата и Главниот одбор „за успех на СБМ и просперитет на Република Северна Македонија“.
„Вашите заложби и почит кон нас борците и нивните продолжувачи нѐ направија повторно горди, нѝ го вратија достоинството, кое некој сакаше да го уништи, но како резултат на взаемните заложби тоа не успеа“, истакна Стојановски.
Потпретседателот на Главниот одбор, Борко Зафировски посебно го нагласи вниманието и посветената отвореност, промоција и соработка со премиерот Заев и соработниците од неговиот Кабинет.
„За јавноста која сака да забележи и запомни, ќе ги наведеме, освен трајното покровителство и грижата, така и големите настани: Покровителство и заедничко одбележување на 70 години од СБМ, 75 години од АСНОМ, Свечената седница на Владата и Главниот одбор на 9 Мај во присуство на пратеничките групи и Дипломатскиот кор, или годинава 80-годишнината од Народното востание и Меѓународната средба, прва по повеќе од 3 децении, а на тема антифашизмот денес“, потенцира Зафировски, истакнувајќи задоволство од вниманието кое на делегацијата на Главниот одбор ѝ е посветено за одбележувања на сите историски датуми.
На средбата беше истакнато дека со доделувањето на Повелбата за долгогодишен и успешен придонес на премиерот Заев за неговите лични заложби за време на неговиот мандат ќе заживее традиција, која ќе биде елан за продолжување и јакнење на продолжување на работата на претставниците на Сојузот на борци и во новото модерно и современо општество.
