Попладнево, во седиштето на СДСМ, поранешниот претседател на партијата – Зоран Заев, официјално му ја предаде функцијата на новоизбраниот претседател на СДСМ – Димитар Ковачевски. Заев му ја честиташе победата на внатрепартиските избори и му посака успешен мандат.
„Претседателе, ти посакувам среќа, мудроста ја имаш. Да ја чуваш оваа најголема и државотворна партија, да ја негуваш социјалдемократијата, да водиш грижа за единството и да ја чуваш слободата и демократијата во нашата земја, како и во партијата“, му порача Заев на Ковачевски.
„Ти посакувам успешен мандат како претседател на СДСМ, да избереш мудро раководство кое ние сите ќе го следиме и заедно под твое раководство ќе се радуваме на победите на следните избори во 2024 година. Нека ти е со среќа“, додаде Заев, потенцирајќи дека СДСМ е столб на државноста.
Ковачевски, од своја страна, му се заблагодари на Заев за сиот негов придонес во водењето на СДСМ, но и на Владата во изминатите години, период во кој, како што нагласи, земјата стана членка на НАТО и постигна историски успеси.
„Ти благодарам и за мудрите одлуки што ги донесе за партијата, но и за државата, благодарение на кои што денеска земјата е членка на НАТО и сме на прагот на почнување на преговори со ЕУ. Благодарам што оставаш партија во наследство што има најголем кадровски потенцијал. Сакам да ти посакам многу здравје, и среќа во личниот и професионалниот живот“, му порача Ковачевски на Заев.
