Продолжува соработката помеѓу Васер и Ферари
Фредерик Васер ќе ја продолжи својата улога како директор на тимот на Ферари во Формула 1, според официјалното соопштение на тимот.
На почетокот на 2023 година, Васер ја презеде позицијата шеф на Ферари. Иако се појавија шпекулации во италијанските медиуми за неговата иднина поради недоволните резултати во првата половина од сезоната, тој доби поддршка од возачите Шарл Леклер и Луис Хамилтон.
Бенедето Виња, извршен директор на Ферари, потврди дека одлуката за продолжување на соработката се базира на доверба и заедничка амбиција.
И покрај фактот што Ферари сè уште е рекордер по бројот на шампионски титули меѓу конструкторите, последната титула ја освоија во 2008 година, а последната победа во конкуренција на возачи беше во 2007 година со Кими Раиконен.
Васер изрази благодарност и нагласи дека пред него стои нов предизвик, откако, како што вели, ги поставил цврстите темели во првите 30 месеци како лидер на тимот.
Во актуелната сезона, Леклер и Хамилтон се на петтото и шестото место во генералниот пласман, додека Ферари е втор меѓу конструкторите, зад Мекларен со разлика од 268 поени.
