„Очигледно СДС многу повеќе се занимава со производство на лажни вести поврзани со уставните измени, отколку што се занимава со решавање на економските проблеми во државата. За Ковачевски приоритет е да ја убедува јавноста во лажната вест дека ВМРО-ДПМНЕ наводно прифаќа уставни измени под бугарски диктат, од тоа да се одглават евроинтегративните процеси и заштити националното достоинство на народот и државата. За СДС поважни се лагите од среќата и напредокот на народот“, обвинуваат од ВМРО-ДПМНЕ.
„Тоа што СДС е принудена да лаже за уставните измени, да шири паника и очај е најдоброто признание дека СДС нема никаков поинаков план освен да турка уставни измени под бугарски диктат што значат капитулација на државата“, истакна потпретседателката на партијата – Гордана Димитриеска Кочоска.
Според неа, предлозите на ВМРО-ДПМНЕ опфаќаат начини како да се дојде до забрзана европска интеграција, ДУИ да оди во опозициjа по дводецениски грабеж и да се зачува достоинството на државата.
„ВМРО-ДПМНЕ предлага одложено дејство на уставните измени кои ќе бидат ефективни после завршување на преговорите со ЕУ и влез на Македонија во Европската Унија. На тој начин притисокот е кај другата страна, и ова ќе биде гаранција дека нема Бугарија да ја кочи државата на патот кон ЕУ.
Одложеното дејствo на уставните измени не е кршење на преговарачката рамка, туку напротив ќе се гарантира дека ќе нема дополнителни уставни и идентитетски отстапки“, истакна Кочоска.
„Првиот предлог е формирање на преодна влада без ДУИ, измени кои ќе стапат во сила со завршување на преговорите и членството на државата во ЕУ.
Вториот предлог е избори, гаранции за националниот идентитет и јазик, економски пакет и заштита на Македонците во Бугарија преку спроведување на пресудите на судот за човекови права во Стразбур и измени од влада без ДУИ поддржана од опозицијата“, потсети таа, обвинувајќи ги премиерот Ковачевски и власта дека „наместо разум, нудат лаги“.
„Ковачевски против Ковачевски. Ковачески рекол, Ковачевски порекол. Прво кажа дека лидерската средба е неуспешна, дека нема отстапки, потоа лаже дека има одговор и лаже дека уставните измени се прифатени. Згора на тоа формирал и работни групи.
Очигледно Ковачевски ќе направи сѐ за да ги спаси ДУИ да оди во опозиција“, обвини Кочоска.
Според неа, ставот на ВМРО-ДПМНЕ е јасен, а власта без одложување треба да одговори кој од двата предлози на ВМРО-ДПМНЕ е прифатлив за Ковачевски, но овој пат, како што посочи, без лаги и спинови.
