Золани Тете, познатиот јужноафрикански боксер и поранешен светски шампион во две категории, беше трагично убиен пред својот дом во Мдантсане, Јужна Африка, во петокот навечер. Имаше само 38 години.
Според почетните информации од полицијата, Тете пристигнал пред својата куќа околу 18:30 часот и чекал во автомобилот да му отворат вратата од дворот. Во тој момент, двајца вооружени и маскирани напаѓачи излегле од второто возило и започнале да пукаат.
Во автомобилот со Тете, се наоѓала 27-годишна жена, која била погодена неколку пати. Веднаш била пренесена во болница, каде што продолжува да се лекува. Тете се обидел да избега, но за жал, добил смртоносни повреди. Напаѓачите избегале и полицијата започнала со потрага по нив.
Смртта на Тете ја потврди министерот за спорт, уметност и култура, Гејтон Мекензи.
Тој истакна дека не сака да шпекулира за мотивите или за идентитетот на сторителите додека трае истрагата.
„Републиката Јужна Африка изгуби еден од најдобрите борци што некогаш ги имала. Нема зборови што можат да го утешат неговото семејство во ваква тешка ситуација“, рече тој.
Tете беше еден од најуспешните боксери од својата генерација. Неговата кариера започна со освојување на светската титула во супер мува категорија на ИБФ во 2014 година, по победата над Теиру Киношита во Јапонија. Потоа, се искачи во погорната категорија, освојувајќи ја титулата во бантам категорија на ВБО со победа над Артур Вилануева во 2017 година, што ја одржа до 2019, кога беше поразен од Џон Риел Касимеро со нокаут.
Во својот професионален рекорд, Тете има 29 победи, од кои 22 со нокаут, со четири порази и еден нерешен меч.
Историски момент за Тете беше 18 ноември 2017 година во Белфаст, кога го нокаутира својот сонародник Сибонис Гонју по само 11 секунди борба за титулата на ВБО. Тој го собори Гонју со првиот удар, десно кроше, по само шест секунди.
Судијата веднаш ја прекина борбата, а Гинисовата книга на рекорди сè уште го држи овој дуел за најбрза победа со нокаут во боксерски натпревар за шампионската титула.
Тете последен пат се натпреваруваше во јули 2022 година во Лондон против Џејсон Канингем, каде што победи со нокаут во четвртата рунда, но резултатот потоа беше поништен поради позитивниот тест за забранетиот станозолол.
Британските антидопинг власти му изрекоа четиригодишна суспензија, која ќе трае до 29 јули оваа година. Тете постојано тврдеше дека не била свесен за забранета супстанца.
По завршувањето на суспензијата, тој имаше желба да се врати во професионалниот бокс. Неговиот менаџер, Мландели Тенгимфене, потврди дека Тете активно тренираше за реваншот што се најавуваше за 29 ноември.
