Шибенско-книнската полиција објави информации во врска со ноќешното апсење на Кристијан Алексиќ, осомничен за убиството на 19-годишниот Лука М. во Дрниш. Полициските службеници забележале Алексиќ околу 2:30 часот на приодот кон градот Дрниш. Брзо реагирале, физички го совладале и го врзале.
При прегледот на 50-годишниот осомничен, откриени биле огнено оружје и нож со сечило долго 20 сантиметри. По апсењето, тој бил приведен во полициска станица, каде што продолжила криминалистичката истрага. Од полицијата соопштија дека во потрагата беа ангажирани максимален број полициски службеници, а во акцијата учествуваа и службени кучиња, хеликоптер и беспилотни летала.
Да потсетиме, Алексиќ во саботата вечер го убил доставувачот на храна Лука М. во Дрниш, а потрагата по него траела околу 28 часа. Според информации од „Далмација Данас“, осомничениот бил уапсен на околу стотина метри од неговата куќа. На местото на настанот останале траги од полициската акција, вклучувајќи полициска лента и лисици.
Неофицијално, Алексиќ бил уапсен без облека и наводно расфрлал бибер зад себе во обид да ги измами полициските кучиња и да го отежне следењето. Жителите на Дрниш сведочат дека бегал преку железничката пруга во близина на својот дом, каде што, според нив, можел да се сокрие во бункерите.
