Кинеската ракета развиена од компанијата „LandSpace Technology“ во саботата успешно постави три сателита во орбитата, означувајќи пресвртница во мисијата на кинеската приватна компанија да развие комерцијално вселенско летало со гориво од метан и течен кислород.
Успешното лансирање би можело да ја зголеми довербата на инвеститорите во метанот како потенцијално ракетно гориво, за кое се смета дека помага во намалување на трошоците и поддршка на ракетите за повеќекратна употреба на почист и поефикасен начин.
Неколку приватни кинески ракетни стартапи изведоа тестови или комерцијални лансирања, со цел да ги развијат своите ракети во услови на зголемена побарувачка во кинеската комерцијална вселенска индустрија.
Ракетата „Zhuque-2 Y-3“ полета во 7,39 часот по локално време од центарот за лансирање на сателити Џиукван во кинеската област Внатрешна Монголија, со што стана третата пробна ракета на „LandSpace“ и првата која успешно ги подигна сателитите во орбитата.
Во друг обид во јули годинава но без сателит, „LandSpace“ стана првата компанија во светот која лансираше ракета на метан и течен кислород, пред американските ривали, вклучувајќи ги „SpaceX“ на Илон Маск и „Blue Origin“ на Џеф Безос. Двете лансирања покажаа дека „Zhuque-2“ е доволно сигурен за комерцијални лансирања, се вели во соопштението на „LandSpace“.
Од „LandSpace“ објавија дека трите сателита се поставени во орбитата на височина од 460 километри. „Zhuque-2“ е способна да понесе носивост од 1,5 тони во орбитата на височина до 500 километри, а „LandSpace“ планира да го зголеми товарот на четири тони во надградени верзии, соопшти компанијата со седиште во Пекинг.
Првото лансирање на ракетите „Zhuque-2“ во декември минатата година не беше успешно.
