Полициски службеници од хеликоптерската единица за јавна безбедност, во соработка со припадниците на Специјалната антитерористичка единица „Тигар“, успешно евакуираа повредено лице од падините на Шар Планина, соопшти Министерството за внатрешни работи.
Акцијата беше спроведена денеска, откако во претпладневните часови беше примен повик за итна помош. Веднаш по добиената информација, хеликоптерот со тим од САЕ „Тигар“ полетал кон местото на настанот и ја извлекол повредената особа од непристапниот планински терен. Станува збор за италијанска државјанка која беше спасена под тешки услови.
По завршувањето на спасувањето, таа беше транспортирана со хеликоптер до Клиничкиот центар „Мајка Тереза“ во Скопје, каде ѝ беше укажана соодветна медицинска помош.
