Уникатното бело Алберобело

Алберобело е мала населба во Јужна Италија. Во буквален превод името значи „убаво дрво”. Позната е по редовите бели куќи, кои на гратчето му даваат уникатен и несекојдневен изглед.

Овие уникатни градби се познати како „Трули“. Покривите им се градени од варовник и други камења, без користење на никаков поврзувачки материјал, како што е малтерот. Заради ова, гратчето се наоѓа на листата на светското културно и природно наследство на УНЕСКО.

Како што рековме, овие камени колиби се изградени од плочки од варовник, наредени една врз друга, за да формираат пирамидални, куполести или конусни покриви. И покрај недостатокот на малтер, структурата е изненадувачки стабилна.

Стилот Трули настанал кога локалните жители имале потреба од лесно-расклопливи куќи. Идејата била да ги сокријат своите домови од даночните инспектори, испратени од кралот на Неапол.

Варовникот бил собиран од соседните региони. Ѕидовите се положени директно врз основата, по отстранувањето на површинскиот слој на почвата, кога тоа било потребно.

Имаат мали прозорци, а камините, печките и местата за седење се врежани во дебелите камени ѕидови. Покривите се изградени од два слоја, а повеќето куќички имаат генијални решенија за собирање на дождовницата.

Дебелите камени ѕидови ги чуваат жителите од топлото сонце, ама во зимските месеци во куќите станува смрзнувачка. Затоа денес преживеаните куќи во стилот Трули пред сé служат како продавници, ресторани и хотели, што не значи дека во многу од нив веќе не живеат локалните жители.