Американскиот претседател Доналд Трамп денес одби да прецизира што точно подразбираат Соединетите Американски Држави под „прекршување на примирјето“ со Иран, и порача на новинарите во Белата куќа дека „ќе дознаат“. На прашањето на новинарка која забележа дека Иран во последните 24 часа повеќепати отворил оган на американски бродови, она што го изјави беше: „Што уште треба да направат за да го прекршат примирјето?“
„Па, ќе дознаете. Тие знаат што треба да прават, а многу добро знаат и што не смеат“, изјави Трамп. Тој нагласи дека Иран во моментов се обидува „да најде мали чамци за да се натпреварува со нашата голема морнарица“, но истовременно тврди дека Техеран всушност „сака да постигне договор“.
Овие изјави доаѓаат во време на ескалација во Ормускиот теснец, каде што американските и иранските сили размениле оган. Судирите се интензивирале откако Трамп го покрена Проект „Слобода“, операција со која американската морнарица се обидува воено да обезбеди и да заштити трговските бродови во овој клучен нафтен премин. Планот предвидува безбедно извлекување на бродовите и екипажите кои останале блокирани, но Иран оваа операција ја прогласи за провокација и „Проект Мртва точка“. И покрај размената на оган, Белата куќа тврди дека целите на Проект „Слобода“ не се врзани за поширока блокада на иранските пристаништа.
Во текот на денот, министерот за одбрана Пит Хегсет одржа брифинг во Пентагон, споделувајќи информации со цел да ја смири ситуацијата. Тој нагласи дека „примирјето не е завршено“. Хегсет истакна дека, и покрај иранските провокации со брзи чамци, тие инциденти сè уште не го надминале прагот што би барал враќање на полн обем на борбени операции.
„Претседателот не капитулирал ни во што. Тој ги држи сите карти и Соединетите Држави ја задржуваат надмоќта“, одговори Хегсет на прашањата за тоа дали администрацијата се откажала од барањето за безусловна предавање на Иран. Тој нагласи дека пристапот на Трамп е јасен: САД не планираат проекти за „градење нација“, туку се фокусирани на слободата на пловидба и трговија.
