Ликот и делото на славниот охридски поет и преродбеник, Григор Прличев, повторно ќе бидат во фокусот на вниманието оваа година, преку низа културни настани во Охрид, во рамките на традиционалната манифестација „Прличеви беседи“.
Оваа манифестација, која се одржува за да се одбележи годишнината од смртта на Прличев, стартува на 5 февруари со изложба на ликовни дела од колекцијата на Центарот за култура „Григор Прличев“ во изложбениот салон.
Основниот настан во рамките на беседите ќе биде врачувањето на наградата „Григор Прличев“ на лауреатот Братислав Ташкоски, кој ја доби наградата за најдобра поема со своето дело „Темна кутија“. На овој собир ќе биде презентирана наградената поема, а лауреатот и претставниците на Општина Охрид ќе се обратат на присутните.
На следниот ден, 6 февруари, чествувањето продолжува со полагање на цвеќиња пред споменикот на Прличев во училишниот двор на ООУ „Григор Прличев“, како и со панихида и полагање цвеќиња на неговиот гроб во близина на црквата „Света Богородица Перивлепта“. Во 11:00 часот, во Спомен-куќата на Григор Прличев ќе се одржи настанот „Стихови и звуци за Прличев“, каде што ќе биде изведена песната „1762 лето“. Претставник на Општина Охрид ќе се обрати, а ќе бидат врачени два примероци од книгата „Јазик и леб“ од Славе Ѓорѓо Димоски, отпечатена со Брајово писмо, на НУ Библиотека „Григор Прличев“ и Здружението за слепи лица од Охрид. Потоа следува читање на наградените литературни творби и промоција на книгата „Охридска книжевна историографија“ од проф. д-р Димитар Пандев и Славе Ѓорѓо Димоски. За 12:30 часот е планирано полагање лаворов венец и цвеќиња пред спомен-бистата на Прличев пред НУ Библиотека „Григор Прличев“, а во 13:00 часот, во библиотеката „Григор Прличев“, ќе се одржи „Прличева визита“, на која ќе биде прикажан документарниот филм „По стапките на Прличев“ на м-р Милчо Јованоски. На овој настан, награда ќе биде врачена и на Софија Стојанова, чија беседа беше наградена на отворениот конкурс. Во 19:00 часот, во Центарот за култура, општинското основно училиште „Григор Прличев“ ќе одржи свечена приредба по повод патрониот празник. Манифестацијата „Прличеви беседи“ ќе биде завршена со осмото издание на поетскиот карван „Добри гости“ во чест на Прличев, во „Култ културен центар“.
„Прличевите беседи“ се устоличени пред шест децении како манифестација за одбележување на годишнината од смртта на големиот поет, кој замина од нас на 4 февруари пред 133 години. Прличев, пред еден и половина век, беше награден со лаворов венец во Атина за неговата поема „Сердарот“.
