Стоилковски: Од Ковачевски ни збор осуда за пораките за 2 Август од Софија, јасна е подготвеноста на Бугарија за асимилација преку условувања

„Јавноста и денеска е покуса за информацијата каде летува Димитар Ковачевски и од кога е заминат во странство, имајќи предвид дека е објавено интервју со него кое што не кореспондира со реалноста и актуелните случувања.

Да бевме малициозни ќе прашавме дали интервјуто е резултат на изложеност на сонце или место Ковачевски одговарал Артан Груби?“, изјави денеска портпаролот на ВМРО-ДПМНЕ, Наум Стоилковски.

Според него, пораките на Ковачевски во  последното интервју се несериозни и не може да се врзат со реалноста.

„Ковачевски се повикува на непостоечки изјави од Софија дека, како вели, нема нови услови. Истовремено, нема осуда за пораките за 2-ри Август од Софија.

„Имено и бугарскиот претседател Радев и бугарскиот премиерот Денков, Илинденското востание го декларираа како бугарско, чија крајна цел била присоединување на Македонија кон Бугарија. Ова е историска невистина, претставува директно негирање на македонскиот идентитет и темелот на македонската државност, но и патоказ за бугарското делување во иднина. Ковачевски ова го премолчи во интервјуто и нема ниту збор за него“, рече Стоилковски.

Тој оцени дека Бугарија е подготвена преку протоколите и преговарањето за заедничката историја да го смени целосно наративот на македонската историја и државност и истото да го претвори во услов за нашето напредување кон Европа.

„Ковачевски ова го прифати, па сега бара национален консензус. Што значи, со други зборови, други да ја споделат со него одговорноста за катастрофалната политика и дипломатија. Националното единство Ковачевски со неговата ароганција и игноранција пропушти да го направи пред точно една година“, обвини портпаролот на најголемата опозициска партија и го повтори нивниот став дека уставни измени нема да има.

Прочитајте и:  СДСМ: По вчерашното интервју на Сиљановска jасно е дека таа нема достоинство да биде претседателка на државата

„И тогаш и сега порачуваме, промена на Уставот под бугарски диктат нема да има! И тогаш и сега велиме: потребни се институционални гаранции од ЕУ за многувековниот идентитет на македонскиот народ, но и гаранции дека процесот на преговори нема да се претвори во подвижна цел во која ќе следат нови и нови условувања до целосна асимилација на Македонија и македонскиот народ. Промената на Уставот под бугарски диктат не е решение, туку само ги отвора апетитите на негаторските кругови во Бугарија. За ова прашање, Ковачевски нема национален консензус со над 85% од јавноста“, подвлече тој.

Единствениот консензус којшто е можен и неопходен, додаде Стоилковски, е консензус за итни предвремени избори. Изборите, посочи, имаат за цел суверенот на Македонија – народот, да каже каква политика ќе се води по ова прашање.

„Борбата за интересите на Македонија е долга и нема предавање и доведување пред свршен чин“, заклучи тој.

- Реклама -