Во рамките на 97. седница, Собранието избра Ацо Ристов за претседател на Регулаторната комисија за енергетика, води и управување со комунален отпад со 68 гласа „за“ и 15 „против“. Ристов е дипломиран електроинженер и располага со значително искуство во областа на енергетиката, хидроенергетиката и инфраструктурните проекти, како и во водоснабдувањето, третманот на води и рударството. Член е на Комората на овластените архитекти и инженери во Македонија, со овластувања за проектирање, надзор и реализација на проекти од прва категорија.
Разгледувањето во Собранието беше обележано со контроверзии во врска со независноста на Ристов. Опозицијата, предводена од Левица, го оспори неговиот кредибилитет и најави формална претставка до Европската енергетска заедница, истакнувајќи можни блиски врски со премиерот. Од власта, пак, нагласија дека Ристов ги исполнува сите законски услови и дека неговото искуство и авторитет го прават компетентен за оваa позиција.
Ристов, кој доаѓа од бизнис секторот, е сопственик на мали хидроцентрали, но се откажа од сите свои бизнис интереси пред да ја преземе новата функција. Поранешниот претседател на РКЕ, Марко Бислимовски, поднесе оставка на 12 февруари годинава. На седницата, ВМРО-ДПМНЕ ги акцентираше квалитетите на Ристов, истакнувајќи три децении искуство и докажан авторитет, додека пратениците од СДСМ и Левица укажаа на потенцијални конфликти на интереси и влијание на политиката во неговиот избор.
