Со малку визија до многу станче

Цели 70 години, ова станче беше заборавен простор со студени камени ѕидови, под еден некогашен хотел во Париз. Архитектката Ен Роланд го претвори во суперслатко пространо, светло и игриво домче, комбинирајќи го стариот историски шарм со модерни вградени елементи од дрво.

Со декади, овој простор бил ретко користен, и тоа единствено како премин од градината кон поголемиот апартман над него. Зградата се наоѓа во една од најстарите париски населби – изградена е во 17 век. Со други зборови, просторот бил затворен и темен, полн со дебели ѕидови и тесни ходници.

Роланд урна добар дел од овие пречки, дел од ѕидовите покри со гипс-картон, дел остави за шмек, подот го поплочи со плочки со дезени како во старите барови во градот, и ете, си доби живо и модерно живеалиште.

Во кујната има и подрум, од оние старовремските, со скалички. Лошата вест е што некогаш служел за фрлање отпад, пред сé животински, бидејќи таму се наоѓала кујната на ресторанот на некогашниот хотел. Добрата е што има природна звучна изолација, совршена за музичко студио. А Ен Роланд да ти свирела гитара…