Според германското издание “Ауто Мотор Унд Шпорт”, главниот дизајнер на Ауди, Масимо Фрасела, изјави дека новата, висока и речиси вертикална решетка на ладилникот ќе стане заштитен знак за сите идни модели на марката. Ова значи дека Ауди се дистанцира од својата препознатлива трапезоидна маска, која со години го обележуваше изгледот на нивните автомобили и имаше одличен одзив кај верните обожаватели.
При претставувањето на концепт Ц, реакциите во јавноста беа мешани. Некои корисници на интернет ја споредија новата маска со “мустаќи за четкање на заби”, шегувајќи се на сметка на стилот кој некогаш го носел Чарли Чаплин, а кој денес носи различни асоцијации.
Но, Ауди изгледа дека не се вознемирува од критиките на социјалните мрежи. Во интервјуто, Фрасела јасно нагласи дека ова е само почетокот на нова ера во дизајнирањето.
Италијанскиот дизајнер ја презеде улогата на главен дизајнер во средината на 2024 година, наследувајќи го Марк Лихте. Пред да се приклучи на Ауди, тој работел на модели како Ленд Ровер Диферендер и Рејџ Ровер Вилар. Негова задача сега е да го редефинира визуелниот идентитет на целата марка.
Концептот Ц не е само дизајнерска вежба, туку и најава за нов спортски модел кој ќе го замени Ауди ТТ. Сепак, се очекува дека овој нов модел нема да носи истото име. Тој ќе задржи форма со две врати и компактни пропорции, но со целосно електричен погон.
На предниот дел, новата решетка е висока и правоаголна, поставена вертикално. Дизајнот е комбинација на реинтерпретација на класичниот преден дел на Ауди и суптилна референца на решетката во облик на потковица, каква што ја има Бугати.
Фрасела истакнува дека ќе се користат основните дизајнерски елементи во сите модели, но со прилагодувања во зависност од сегментот на возилото.
„Создадовме одредени дизајнерски елементи што можат да се применуваат флексибилно, така што моделите од сегмент А значително се разликуваат од спортските автомобили и теренците, но сепак создаваат заедничка нишка“, објасни тој. „Сакаме нашите автомобили да бидат веднаш препознатливи како Ауди, но секој модел треба да има свој уникатен карактер. Тоа се постигнува преку пропорции, специфични линии, изглед и ‘очи’“.
Другите промени не се однесуваат само на екстериерот. Концепт Ц најавува нова насока и во ентериерот, при што Ауди планира делумно да се оддалечи од трендот на големите екрани кои доминираат во контролите на модерните автомобил.
Наместо тоа, компанијата се враќа кон физичките копчиња и контролни бројчаници за важните функции, што е добредојдено за возачите кои се уморни од постојано барање на основните поставки на екрани осетливи на допир.
Првиот сериски модел со оваа нова дизајнерска концепција ќе биде електричниот наследник на ТТ, базиран на концепт Ц.
