Во својата прва јавна изјава од почетокот на војната меѓу Израел и палестинските терористички групи во Појасот Газа, началникот на Генералштабот на израелската армија (ИДФ), генерал-полковник Херци Халеви, ги призна пропустите што овозможија инфилтрација на Хамас и масовни убиства во саботата.
„ИДФ е одговорна за безбедноста на земјата и нејзините граѓани, а во саботата наутро во областа околу Појасот Газа, тоа не го решивме. Ќе научиме, ќе истражиме, но сега е време за војна“, истакна Халеви од јужен Израел.
Тој нагласи дека Израел ќе направи се што може за да ги врати заложниците земени од Хамас и другите групи.
„Пет дена сме по убиствениот, брутален и изненадувачки инцидент. Колењето на терористите убијци на Хамас, човечките животни, нашите деца, нашите жени и нашите луѓе е животинско, нехумано. ИДФ се бори против безмилосните терористи кои извршиле незамисливи дела. Јахја Синвар, владетелот на Појасот Газа, се одлучи за овој ужасен напад, па тој и целиот систем под него се мртви луѓе. Ќе ги нападнеме, ќе ги уништиме, ќе го разбиеме нивниот систем“, истакна Халеви.
Тој посочи дека ќе дојде време да се испита како Хамас успеал да го изврши нападот.
Во врска со околу 200 Израелци и странци заробени од терористичката група во Појасот Газа, Халеви рече дека ќе направи се за да ги врати заложниците дома.
„Убиваме многу терористи, команданти, ја уништуваме терористичката инфраструктура што го поддржува ова ужасно, брутално злосторство“, рече Халеви.
Како што додаде, Газа нема да изгледа исто.
МИА
