Шансите да те удри гром и да добиеш на лото во еден ист живот

Да те погоди гром баш тебе од цела Канада, треба да си невиден малер. Да добиеш на лото во Канада, треба да си невиден среќник. Питер МекКати е и двете!

Канаѓанецот од Нова Скотија има преживеано удар од гром уште како дете, додека се брчкал во плиткото на едно езерце кога имал 14 години. Шансите да си таков малер се 1 на 1 милион. Лани летоска, истиов овој „несреќник” (со уште еден колега) ја доби премијата од 1 милион долари на Атлантик лотаријата. Шансите да си таков г’злак (со опроштение), се 1 на 14 милиони.

За да дознаат колку е всушност голема импресивната неверојатност да ти се случат овие две нешта во животот, репортерите од CTV News Canada се обратија кај професорката по математика на универзитетот во Монктон – Софи Леџер. „Ако претпоставиме дека овие два настана се случиле без никаква поврзаност… значи, веројатноста да добиеш на лото… помножена со веројатноста да те удри гром… ќе добиеме отприлика 1 на 2.6 трилиони“, пресмета математичарката.

Ете ви. Животот може да ви приреди буквално сé, ама статистички, тој на МекКати е највозбудлив и не можат да го победат ни милион селфиња од искачување на Монт Еверест, скокање со падобрани или што ти уште не.