По бројните критики кон Апелацискиот суд Скопје поради поништената првостепена пресуда и враќањето на предметот „Таргет-Тврдина“, вклучително и од шефот на државата, се огласи и одбраната на поранешниот шеф на УБК – Сашо Мијалков.
„Одбраната на господинот Сашо Мијалков ја поздравува одлуката на Апелациониот суд во Скопје затоа што е законита и праведна и заснована на доказите и фактите кои се наведени во жалбата поднесена против првостепената пресуда“, се вели во реакцијата.
„Во текот на целата главна расправа одбраната укажуваше на бројните повреди на законот. Повреди кои доведоа до неоснована и правно неиздржана пресуда. Наместо да одговори на сите отворени прашања околу незаконското следење на комуникации, Основниот суд без аргументи и докази донесе осудителна пресуда против нашиот клиент. Пресуда за која беше јасно дека нема да ја издржи проверката во повисокиот суд“, вели одбраната на Мијалков.
Актуелните политички напади врз судскиот совет во Апелациониот суд, реагираат тие, се неприфатливи и заслужуваат најсериозна осуда.
„Одбраната сѐ уште ја нема добиено пресудата на Апелациониот суд во Скопје и сѐ уште не ги знае аргументите и насоките на второстепениот суд. Знае само дека се изразува ‘загриженост’ или ‘згрозување’ од највисоки државни функционери од извршната власт. Тоа е директно мешање и вршење притисок врз судската власт која мора да биде независна. Уште позагрижувачки е дека таквиот притисок е јавен и покажува дека оправдан бил стравот за политичко мешање уште од самиот почеток на постапката и се влијаело да се донесе првостепена пресуда каква што беше донесена“, реагира одбраната на Мијалков, најавувајќи дека за ваквите притисоци и мешање во судската власт ќе го информираат и Судот за човекови права во Стразбур, бидејќи со тоа се нарушуваат правата на нивниот клиент за фер и правично судење, што во ваква атмосфера и хајка врз судиите, велат, е невозможно да се добие.
„Ниту Претседателот на државата, ниту министрите во владата не се тие кои треба да носат судски одлуки. Тоа право им припаѓа исклучиво на оние кои дале заклетва дека ќе делат правда и биле избрани за тоа, а сѐ останато е недозволено мешање кое го урива интегритетот на судството кој заради политичките влијанија е сериозно разнишан“, реагира одбраната на Мијалков, кој од првостепениот суд чија одлука е укината беше осуден на 12 години затвор.
