Рускиот претседател Владимир Путин и индискиот премиер Нарендра Моди денеска одржаа разговори во Казан на маргините на самитот на БРИКС.
– Благодарен сум што го прифативте нашиот повик и лично дојдовте во Казан на самитот на БРИКС, изјави рускиот лидер на почетокот на состанокот.
Тој истакна дека Москва ја цени соработката со Индија во рамките на форматот БРИКС. – Во Казан треба да донесеме серија важни одлуки за понатамошно унапредување на активностите на асоцијацијата и зајакнување на повеќестраната соработка, додаде Путин.
Според него, односите меѓу Русија и Индија се карактеризираат како специјално, привилегирано стратешко партнерство и продолжуваат да се развиваат активно. Рускиот лидер укажа дека трговската размена меѓу двете земји е на задоволително ниво и потсети дека следниот состанок на меѓувладината комисија ќе се одржи во Њу Делхи на 12 ноември.
Моди изјави дека му е драго што дошол во Казан на самитот на БРИКС, и истакна дека Индија има длабоки историски врски со овој град.
Тој рече дека многу земји од светот сакаат да се приклучат на БРИКС и дека се радува на разговорите во рамките на асоцијацијата. Индискиот премиер исто така додаде дека Њу Делхи е постојано во контакт со Москва во врска со украинскиот конфликт. – Како што претходно реков, веруваме дека проблемите треба да се решаваат по мирен пат и целосно ја поддржуваме што поскорешната обнова на мирот и стабилноста.
Во сите наши напори приоритет ни е хуманоста и подготвени сме да дадеме каква било помош и во иднина, изјави тој.
Самитот на БРИКС, кој се одржува во Казан од 22 до 24 октомври, е најголемиот надворешно-политички настан што некогаш се одржал во Русија. Помошникот на претседателот Путин, Јури Ушаков, претходно соопшти дека на самитот учествуваат 36 земји (од кои 22 на највисоко ниво), а присуствуваат и лидери на шест меѓународни организации. Путин има планирани меѓународни контакти во рамките на самитот.
Денеска веќе се сретна со претседателката на Новата развојна банка, Дилма Русеф, а подоцна ќе разговара со претседателот на Јужна Африка, Сирил Рамафоса, египетскиот претседател, Абдел Фатах ал-Сиси и претседателот на Кина, Си Џинпинг.
БРИКС е меѓудржавна асоцијација основана во 2006 година од Русија, Кина, Индија и Бразил. Од почетокот на 2024 година, во групата се вклучија и Египет, Етиопија, Иран, Обединетите Арапски Емирати и Саудиска Арабија.
Годишното претседателствување на Русија со организацијата започна на 1 јануари оваа година и се одвива под мотото зајакнување на мултилатерализмот за рамномерен глобален развој и безбедност.
