Во Министерството за спорт, на 6 мај 2026 година, се одржа првиот работен состанок на Меѓуресорската група што работи на подготовката на Националната стратегија за развој на спортот за периодот 2026-2030.
На состанокот присуствуваа државниот секретар Сашо Огњеновски, Тања Блажевска, раководителка на Одделението за оперативно-аналитички работи во Секторот за спорт и координатор на работната група, како и Игорче Кузмановски, раководител на Одделението за развој и унапредување на спортскиот систем. Неизоставни беа и членови и заменици членови кои ја претставуваа широката палета на институции вклучени во подготовката на стратегијата, меѓу кои Генералниот секретаријат на Владата на Република Македонија, Министерството за образование и наука, Министерството за култура и туризам, Министерството за надворешни работи и надворешна трговија, Министерството за социјална политика, демографија и млади, Министерството за внатрешни работи, Министерството за финансии, Министерството за транспорт, како и претставници од Државното правобранителство.
На почетокот на состанокот се истакна значењето на овој стратешки документ за развојот на спортот, кој е еден од клучните приоритети на Владата на Република Македонија.
„Спортот е специфична област која е директно или индиректно поврзана со многу други сфери. Изготвувањето на Националната стратегија за развој на спортот е комплексен процес во кој ќе бидат вклучени сите релевантни актери – државни институции, национални спортски федерации, универзитетски професори и стручњаци од областа на спортот. Верувам дека нивниот ангажман ќе придонесе за успешното создавање на овој стратешки документ во предвидениот рок“, рече државниот секретар Сашо Огњеновски.
