Западните земји станаа невидено активни по претседателските избори во Русија, изјави денеска портпаролката на Министерството за надворешни работи Марија Захарова.
„Ова е приказна без преседан, во смисла на некакво саботажно активирање на колективниот Запад“, истакна Захарова во интервју за руски медиуми.
Првиот ден од претседателските избори во Русија беше нарушен со низа инциденти, меѓу кои и истурање боја во гласачки кутии, фрлање молотов коктел на избирачко место во родниот град на претседателот Владимир Путин и серија кибер напади.
Милиони Руси гласаа во 11 временски зони во земјата на почетокот на тридневните избори кои речиси сигурно ќе му дадат на Путин уште шест години на чело на најголемата земја во светот по територија.
Среде војната во Украина, најсмртоносниот конфликт во Европа по Втората светска војна, 71-годишниот Путин доминира во руската политика и ниту еден од тројцата други кандидати на гласачкото ливче не му претставува веродостоен предизвик.
Во гласачките кутии во Москва, во анектираниот Крим и во регионот Карачај-Черкезија на Кавказ, беше истурена боја во гласачка кутија, пишуваат руските медиуми.
Надзорна камера го сними инцидентот – млада жена е снимена како го става своето гласачко ливче во гласачката кутија, а потоа мирно истура зелена течност во неа. Полицаец веднаш потоа ја привел.
Молотов коктел бил фрлен на избирачко место во Санкт Петербург, а 21-годишна жена е уапсена. На гласачките места во Москва и Сибир се забележани обиди за подметнување пожар.
Шефот на руската изборна комисија, Ела Памфилова, рече дека на сторителите на таквите дела им се заканува затворска казна до пет години и сугерираше дека сторителите биле платени од оние кои сакале да го нарушат гласањето.
Одѕивот беше голем низ целата земја – во 17:20 часот по московско време – околу 24,6 отсто. Електронското гласање беше толку големо што системот беше преоптоварен.
Изборната комисија соопшти дека имало повеќе од 10.000 напади врз електронските системи за гласање, но дека нема штети.
Портпаролот на дисквалификуваниот претседателски кандидат Борис Надеждин изјави дека денеска биле уапсени двајца вработени и еден волонтер поврзан со неговата кампања и дека еден активист бил нападнат на гласачкото место.
За функцијата шеф на државата се натпреваруваат четворица кандидати – Леонид Слуцки, Николај Харитонов, Владислав Даванков и Владимир Путин.
Гласањето почна денеска, а ќе заврши на 17 март.
МИА
