Патот на Украина кон пристапување во НАТО е опишан како „неповратен“ во нацрт-заедничкото соопштение на Алијансата, изјавија за Си-Ен-Ен три извори запознаени со ова прашање. Колку силно треба да и се ветува на Украина за нејзиното идно членство во НАТО, беше клучна тема на разговор меѓу 32-те членки на Алијансата пред самитот на НАТО во Вашингтон, кој започна денеска. Си-Ен-Ен додава дека нацртот може да се промени пред конечната верзија, но самото присуство на зборот „неотповикливо“ би било значаен сигнал за Киев и Москва „додека војната во Украина продолжува без јасни знаци за крај“. Еден од изворите, американски функционер, рече дека Белата куќа го поддржува користењето на тој збор во последното соопштение, под услов документот исто така да потврди дека Украина мора да продолжи да работи на демократските реформи. Официјалниот претставник рече дека конечната верзија се очекува да ја содржи таа формулација. Тридневниот самит на НАТО, по повод 75-годишнината од постоењето на таа воена алијанса, се одржува од денеска до 11 јули, а главна тема на состанокот ќе биде потврда на непоколебливата поддршка за Украина. Сојузниците, исто така, ќе разговараат за зајакнување на одвраќањето и одбраната, зголемување на военото производство и индустриската база, подобрување на партнерствата во Алијансата и инвестирање во сопствената и колективната одбрана на членките на НАТО.

Во рамки на посетата на Вашингтон САД, претседателот на Владата на Република Северна Македонија, Христијан Мицкоски остварил повеќе средби и состаноци, меѓу кои продуктивна и пријателска средба со конгресменот Брендaн Бојл, соопштија од владината прес-служба.

– Разговараа за приоритетите на НАТО алијансата и важноста да се зачува демократијата и мирот. На средбата се промовираа економските можности и потенцијали кои ги нуди државата, како и одлучната битка против корупцијата и криминалот што е и клучна определба на новата влада, се наведува во соопштението.

Премиерот Мицкоски имал и работна средба со претседателката на NDI, Тамара Кофман Витес, со која разговарале за демократските процеси во државата.

– Еден од најакутните проблеми е корупцијата за што како нова Влада работиме интензивно за нејзино искоренување, што подразбира и одговорност за престапниците на законот. Очекувањата на граѓаните не смееме да ги изневериме, да работиме на воспоставување на механизми каде граѓанинот ќе биде заштитен исто како и неговите интереси. Завршува времето на лаги, неспособност и не работа. Почнува време на реформи, инвестиции, дигитална трансформација. Мораме да дадеме добар пример за сите во изнаоѓање на пат до подобар животен стандард и сигурна држава која припаѓа на сите граѓани, подвлекол на средбата Мицкоски.

Тој остварил средба и со поранешниот амбасадор на САД во земјава Филип Рикер, на која се разговарало за предизвиците со кои се соочува државата, како и поддршката која е потребна за остварување на стратешките интереси.

Мицкоски разговарал и за потенцијалот што го нуди регионот за економска и политичка соработка.

– Мораме да ја менуваме реалноста и подобруваме животот на граѓаните, посочил Мицкоски, се додава во соопштението.