Папата Франциско ги повика израелските и палестинските власти да ги засилат напорите за барање дијалог, по неодамнешните смртоносни бомбашки напади во Ерусалим и судирите на окупираниот Западен Брег.
Во неделниот благослов одржан пред десетици илјади собрани на плоштадот Свети Петар, Светиот Отец рече дека насилството ја „убива иднината“ на двата народа, пренесува Хина.
Во средата две бомби експлодираа на автобуски постојки во предградијата на Ерусалим, при што загина 16-годишно момче, а најмалку 14 лица беа повредени. Се чини дека станува збор за напад на палестински членови на вооружени групи.
Во саботата од здобиените повреди починал и педесетгодишен маж.
Ескалација на насилството
Доцна вечерта во вторникот, израелските воени сили убија 16-годишно палестинско момче во судирите во градот Наблус, окупиран од Израел, на Западниот Брег.
Папата ги спомна двата инциденти во Ангел Господов, нарекувајќи ги експлозиите во Ерусалим „гнасни“. Тој рече дека е загрижен поради зголемувањето на насилството во последните месеци.
„Насилството ја убива иднината, ги прекинува животите на најмладите и ја слабее надежта за постигнување мир. Да се молиме за овие загинати млади луѓе и за нивните семејства, особено нивните мајки. Се надевам дека и израелските и палестинските власти посилно ќе се ангажираат во барањето меѓусебен дијалог, градење меѓусебна доверба без која никогаш нема да се најде решение за мир во Светата земја“, рече папата Фрањо.
