Виена, 16 септември 2021 (МИА) – Пандемијата на коронавирусот не го забави немилосрдниот напредок на климатските промени, се вели во научен извештај United in Science 2021 на ОН.
Помеѓу јануари и јули, глобалните емисии на фосилни горива на СО2 во енергетските и индустриските сектори веќе беа на исто ниво или повисоки отколку во истиот период во 2019 година, пред пандемијата.
Севкупните намалувања на емисиите во 2020 година, за време на првиот бран на Ковид-19, беа „краток застој“, објавија вчера Светската метеоролошка организација (СМО), Меѓувладиниот панел за климатски промени (ИПЦЦ) и други организации.
„Овој извештај покажува дека досега во 2021 година не одиме во вистинската насока“, рече генералниот секретар на СМО, Петери Талас.
Досега оваа година, емисиите на СО2 од патниот сообраќај беа под нивото пред појавата на пандемијата. Сепак, концентрациите на главните штетни гасови што придонесуваат за глобалното затоплување продолжија да се зголемуваат во 2020 година и првата половина на 2021 година, се вели во извештајот.
„Сѐ уште сме значително надвор од распоредот за да ги исполниме целите на Парискиот договор“, рече генералниот секретар на ОН, Антонио Гутереш, во врска со напорите за одржување на глобалната температура да се искачи под 2 Целзиусови степени.
Според бројките на ОН, глобалната просечна просечна температура на површината за периодот од 2017 до 2021 година е меѓу најтоплите досега регистрирани, проценета на 1.06 Целзиусови степени до 1.26 Целзиусови степени над прединдустриското ниво (1850-1900).
До 2025 година, може да се искачи до 1.8 степени. Дури и ако се исполнат климатските цели, нивото на морето може да се зголеми помеѓу 0.3 и 3.1 метри до 2300 година.
