Обвинителството истражува можен нелегален транспорт на човечки ткива
Според обвинителството, сериозноста на овие обвиненија е голема, бидејќи се однесуваат на обработка, замрзнување и меѓународен транспорт на човечки ткива. Ова покренува прашања за почитување на законските и етичките стандарди во експериментирањето со човечки биоматеријали. Заради тоа, е оформен предмет со цел да се испита дали може да се утврди постоење на елементи на кривично дело.
Овој предмет е предаден на Основното јавно обвинителство за гонење на организиран криминал и корупција. Тие треба да преземат мерки за прибирање официјални информации од надлежните органи, институции и здравствени установи.
Главниот фокус на истрагата е насочен кон утврдување на евентуално нелегално постапување со човечки ткива и биоматеријали, како и на можни пропусти или злоупотреби при добивањето на дозволи и согласности за таквите активности.
Според неодамнешни информации, македонски професор од Универзитетот во Колумбија бил вмешан во набавка на мозоци од Македонија за истражувања на неколку универзитети во САД. Во објавените документи од американското Министерство за правда се потврдува дека се работи за околу 1.000 мозоци, вклучувајќи и од лица кои извршиле самоубиство. Не постои информација дали семејствата на починатите дале согласност за употреба на органите, ниту дали македонската држава одобрила такви активности.
Во изјава на 5 февруари 2019 година, спомнати се истражувања за причините на самоубиствата и биологијата поврзана со нив. Се споменуваат неколку реномирани научници од универзитети во Питсбург, Колумбија, Њу Јорк и Јејл.
