Во рамки на Парламентарното Собрание на Советот на Европа, вели потпретседателот на ВМРО-ДПМНЕ – Александар Николоски, остварил бројни средби на кои разговарал за позициите на Македонија. Врз основа на овие разговори, Николоски денеска предупреди на обидите кои Бугарија ги прави за негирање на македонскиот народ, македонскиот јазик и македонската самобитност, преку злоупотреба на нејзината позиција како земја членка на ЕУ и користејќи го правото на вето.
„Морам да признаам дека она што ме загрижува во овие разговори е што бројни соговорници прашуваат како е возможно македонската Влада да прифатила предлог кој што е крајно штетен за Македонија. Што е најдобар доказ дека Владата на СДСМ и ДУИ, Владата на Ковачевски, дала согласност за последниот предлог кој што директно ја негира засебноста на македонскиот народ, македонскиот јазик и ја брише историјата и практично значи бугаризација на Македонија“, вели Николоски.
Според него, тоа значи дека Македонија нема да ги почне преговорите со ЕУ и да стане членка сѐ додека целосно не се бугаризира. Доколку тоа не се случи, Македонија никогаш нема да стане членка на ЕУ, констатира потпретседателот на ВМРО-ДПМНЕ.
Тој ја повика Владата и двете најголеми партии во власта – СДСМ и ДУИ, итно да го одбијат францускиот предлог.
„Презентирањето на еден ваков предлог од страна на многу сериозна држава како Франција не може да помине без знаење и согласност и од Владата на Бугарија и од Владата на Македонија. И затоа исклучително многу загрижува молкот на Владата на СДСМ и ДУИ по однос на последниот предлог што само го потврдува она што го слушнав деновиве во Стразбур,а тоа е дека Владата за жал дала согласност на овој предлог. Ги повикувам јавно да излезат и да го кажат нивниот став по однос на предлогот, да го отфрлат предлогот затоа што тој е крајно штетен за Македонија и пред сѐ за Македонците како доминантен народ во Македонија, и на тој начин да ги заштитат македонските национални интереси“, порача Николоски.
Прифаќање на овој предлог, вели тој, води кон уништување на Македонија ваква каква што ја познаваме.
„Овој предлог е дебакл за македонската дипломатија. И овој предлог значи ништо друго освен целосно исполнување на барањата на Бугарија. И затоа истиот треба да биде отфрлен“, додаде Николоски, потенцирајќи дека приказните дека Македонија ќе почне преговори се неточни затоа што предлогот јасно зборува дека преговори не можат да почнат додека не се смени Уставот на Македонија, а за тоа, подвлекува, е потребно двотретинско мнозинство.
„Јасно кажуваме како ВМРО-ДПМНЕ дека ваков штетен предлог нема да прифатиме и подржиме и дека секогаш ќе бидеме на браникот на Македонија и интересите на македонскиот народ“, порача Николоски.
„Ќе продолжам да говорам тука, но мислам дека истото треба да го прават и од Владата и не треба да играат детски игри од типот ‘одат или не одат во Брисел’ да се сретнат со европските челници. Местото на македонската влада, на врвните луѓе во македонската влада, е да бидат таму каде што се носат одлуките – ако се носат во Брисел во Брисел, ако се носат во Париз во Париз, ако се носат во Берлин во Берлин – и на тој начин да работат за Македонија, а не како мали деца на коишто не им се допаѓа играта да ја дупнат топката, односно да речат ние не доаѓаме, а претходно веќе се согласиле на предлог којшто е крајно штетен за Македонија и за којшто јавноста има огромна реакција“, истакна Николоски.
