Судот во Франција донесе пресуда со која се осудува тамошниот огранок на Скиентолозите за измама и подели високи парични, како и затворски казни. Од друга страна, уште една славна личност јавно се откажа од членството во организацијата, а нивниот портпарол предизвика скандал на американската телевизија ABC.
Судот во Франција донесе пресуда со која се осудува тамошниот огранок на Скиентолозите за измама и подели високи парични, како и затворски казни. Од друга страна, уште една славна личност јавно се откажа од членството во организацијата, а нивниот портпарол предизвика скандал на американската телевизија ABC.
Првиот удар за Скиентологијата дојде од Франција – држава која од стартот е во војна со Скиентолозите затоа што не ги признава како религијата, туку ги смета за секта. Тамошниот суд, по тужбата од две жени, ја осудија организација за измама, одредија казна од 600 илјади евра, а главниот Скиентолог за Франција го осудија на затворска казна од 2 години и парична казна од 30 илјади евра за обвинението организирана измама. Првата жена ги тужела затоа што ја натерале да потроши 20 илјади евра на витамини и курсеви за себеподобрување откако направила еден од познатите стрес-тестови. Другата тврди дека била отпуштена од шефот кој бил член на организацијата, зашто одбила да пристапи. Портпаролот на Скиентолозите, Томи Дејвис (син на актерката Ен Арчер, долгогодишен член на „Црквата на Скиентологија“), изјавил дека пресудата ги прекршила правата на групата и очекува да биде променета по жалбените постапки.
Токму Томи Дејвис предизвика скандал при гостувањето во емисијата Nightline на американската телевизија ABC. Кога од водителот добил прашање дали верува во интергалактичкиот вонземски лидер Гзину, околу кој е центрирана скиентолошката приказна, тој демонстративно го напуштил студиото, велејќи дека таквите прашања наведуваат на „одвратни перверзии“ за црквата на Скиентологија. Подоцна, околу 45 минути пред закажаното емитување на емисијата, тој се појавил во телевизијата ABC барајќи снимките од неговото интервју да бидат извадени. Барањето било одбиено.
Најголемиот удар веројатно доаѓа од сценаристот и режисер Пол Хаџис (Million Dollar Baby, Crash). Неодамна, тој се откажа од своето членство, упатувајќи му отворено писмо на Томи Дејвис. Во него ги искажува своите несогласувања со политиката на „одделување“ (прекинување на врските со семејството и пријателите кои не ја одобруваат Скиентологијата), неговото лично несогласување со скиентолошкото противење на геј-браковите во Калифорнија, како и начинот на кој се употребени доверливи информации за да се дискредитира Ејми Скоби, жената која го водела регрутниот центар за славни личности повеќе од 20 години, откако решила да си замине. Во писмото, меѓу другото, Хаџис напишал:
„Како се осмелувате да искористите приватни информации за да етикетирате некого како ’прељубник’? Ги зедовте најинтимните исповеди на Ејми Скоби за нејзиниот сексуален живот и ги предадовте на медиумите и потоа ги објавивте во вашето гласило! Таа ја водеше целата мрежа за славни личности и беше лојален член на црквата колку, 20 години? Ако сакате да ги негирате нејзините обвинувања, направете го тоа, направете го најсилно што можете, но таквиот начин на атентат на личноста е незамислив“.
