Неопходно ли е да се загрева автомобилот пред поаѓање?

Сите сме слушнале дека е неопходно возилото да се загрева пред тргнување, особено при ниски температури во зима.

Идејата на оваа акција е да се нормализира температурата на моторот, ако степените надвор бележат минус.

Оние кои го следат правилото, тврдат дека со “загревањето” на автомобилот моторот се оптоварува помалку и на тој начин се продолжува неговиот живот. Убеденоста во ова тврдење е главна причина да гледаме како во зима стотици луѓе поминуваат десет-петнаесет минути во своите автомобили, со запален мотор, пред да го стартуваат.

Дали навистина овој совет се базира на факти и студии или е само мит?

Експертите истакнуваат дека станува збор за стара навика од времето кога автомобилите имаа мотори со карбуратори. Тогаш загревањето на моторите при ниска температура на воздухот пред придвижување имало смисла.

Денес поновите модели имаат електронско вбризгување на горивото. Сензорите ја мерат надворешната температура и системот ја приспособува работата на моторот па се смета дека е доволно моторот да работи само 30-тина секунди пред тргнувањето.

Потоа може да се започне со возењето бидејќи моторот побрзо ќе ја достигне работната температура доколку возилото е во движење, отколку кога моторот работи во лер, тврдат од американската Агенција за заштита на животната средина.
Освен бучавата што ги вознемирува соседите, за животната средина се многу поопасни издувните гасови што ги испушта автомобилот при продолженото работење во место.

Американско истражување од 2009 година покажало дека работата на автомобилските мотори во лер предизвикува 1,6 отсто од вкупната емисија на гасовите одговорни за ефектот на стаклена бавча. Тоа е повеќе од загадувањето предизвикано од работата на целокупната челична индустрија во таа земја, пренесива порталот МКД.мк.

Има уште една важна причина зошто го загреваме автомобилот пред тргнување. За време на зимата попријатно ни е да седнеме во топла кабина отколку да се смрзнуваме при возењето додека да се загрее автомобилот.

Иако периодот потребен за загревање на патничката кабина кај современите возила е пократок од порано, а некои автомобили имаат и грејачи во седиштата, многумина сѐ уште возат постари автомобили кои побавно се загреваат.
Сепак, имајте предвид дека беспотребната работа на вашиот автомобил во лер директно влијае врз квалитетот на воздухот што го дишете и дека е подобро да се издржи малку студ отколку дополнително да ја загадуваме животната средина.