Министерот за здравство Венко Филипче денеска демантираше дека над 400 млади лекари ја напуштиле земјава, како што тврди Асоцијацијата на млади лекари и специјализанти.
„Откако излезе таа информација во јавност ние ги проверивме податоците и бројките. Не знам дали станува збор за лажна информација или некој сакал да ја спинува информацијата, но во Лекарската комора издадени се само околу 160 потврди за заминување во странство, а тоа им треба на сите млади или лекари со искуство кои треба да одат да работат макар и привремено, заради тоа што без таа потврда не можат да ги нострифицираат документите во било која држава”, рече Филипче.
Според него, тоа е за 20 потврди помалку од минатата година, што укажувало дека даваат резлутати мерките од последните две години-вработување за сите невработени лекари преку мерката за шестмесечниот стаж, над 5.000 дадени согласности, за 50 отсто зголемени плати, а догодина и за речиси сто проценти односно и надминати 100.000 денари на некои клиники и институции. Филипче додава дека тоа се дел од мерките што младите лекари ќе ги задржат овде во земјава.
Асоцијацијата на млади лекари и специјализанти изминатава недела излезе со тврдење дека од земјава се иселиле над 400 лекари. Тие формирале и Регистар на лекари кои се надвор од земјава за да ја следат состојбата со нивното иселување.
