„По општинските комитети се бара возило повеќе за да им се овозможи на луѓето кои изразиле желба да присуствуваат на протестот в сабота“, тврди лидерот на ВМРО-ДПМНЕ – Христијан Мицкоски, во пресрет на протестот што партијата го најави на 18 јуни, сугерирајќи масовност на улиците.
„Знамиња, пароли, пораки за промени, обезбедување возила за превоз… Во општинските комитети на ВМРО-ДПМНЕ е многу фреквентно. Очекувам голема посетеност и одзив на народот на протестот кој ќе се одвива под слоганот ‘Премногу е! Протест за промени’ “, изјави Мицкоски за „Дојче Веле“.
Тој уште минатиот месец 18-ти јуни го опиша како датум-меѓник помеѓу првиот и вториот дел од партиските активности, кои ќе бидат континуирани во текот на летото. Како што велат од ВМРО-ДПМНЕ, според најавените активности ова лето ќе биде политички многу жешко, а според економските показатели – и многу тешко.
„Лошиот живот, инфлацијата, лошата економија стануваат неподносливи, а огромен број на граѓани бараат излез од актуелната состојба. И, знаејќи дека поминаа 5 години од истата влада, многу јасно е дека за неколку месеци од сега нема да се живее подобро. Од тој аспект најдобро решение се избори, на кои оваа Влада ќе биде срушена. Подготовките течат на солидно ниво и можам да кажам дека има огромен интерес и одзив на многу луѓе кои ќе дојдат во Скопје на 18-ти јуни. По општинските комитети се бара возило повеќе за да им се овозможи на луѓето кои изразиле желба да присуствуваат на тој протест“, вели лидерот на најголемата опозициска партија.
Според него, партијата сака со масовно присуство да испрати порака до власта за тоа какво е расположението на граѓаните за промени, но и „свесна е дека тие промени не може да се случат ниту преку ноќ, ниту со еден протест“.
„Оваа власт, која силно ги узурпира институциите и процесите, не е можно да падне со еден протестен собир. Целта на протестот е да испратиме порака на масовност, дека овој народ има свој став, но и да дадеме јасна порака дека вака повеќе не може. Воедно ќе испратиме и порака дека Владата не смее да го игнорира народот и неговата волја, и затоа во периодот што следи ќе бидеме уште погласни и уште поприсутни, и во тој аспект сите опции се возможни“, најавува Мицкоски, кој на протестот ќе има обраќање пред граѓаните.
Лидерот на ВМРО-ДПМНЕ засега не ги открива сите можни опции, но тврди дека тие ќе кулминираат со масовен активизам.
„Наредните чекори ќе бидат во правец на рушење на власта користејќи ја демократијата, улицата, и обединувајќи го народот против најголемата причина за колективната несреќа, а тоа е оваа власт. Кога нема никаква причина да се одржи Владата, природно е да се провери волјата на народот и да има избори. Доколку таа можност се одбие, тогаш на сцена ќе стапат чекорите кои ќе ги најавиме во периодот што следи, а се во насока на мобилизација и масовен активизам“, најави Мицкоски.
Во изминатиов период копјата меѓу власта и опозицијата постојано се кршат по прашањето – дали се нужни предвремени избори? Власта смета дека „не се потребни и не е време за тоа“, а опозицијата – дека „за оваа катастрофа, актуелната влада не е решение, туку проблем“.
„Нема да глумиме нормализација, затоа што и реалноста која ја живееме не е нормална“, порача, како и претходно во повеќе наврати, Мицкоски.
Како што информираа од ВМРО-ДПМНЕ, тој вчера остварил средба со Марион Валсман (пратеничка во ЕП и потпретседателка на Заедничкиот парламентарен комитет на Делегацијата на ЕУ во Македонија) и со Даниел Браун (официјален претставник на Фондацијата Конрад Аденауер за Македонија), на која се разговарало за потребата од отпочнување на преговорите на земјава со ЕУ, што може да се случи доколку се тргне неразумното вето од страна на Бугарија. На средбата Мицкоски истакнал дека „земјата оди во многу лоша насока со владата на СДСМ и ДУИ, дека тоне во кризи кои не се увезени туку автентични, и дека излез од катастрофалната состојба се само предвремени парламентарни избори, кои треба да се случат што побрзо“.
Премиерот Ковачевски, пак, во повеќе наврати повтори дека нема да има предвремени, туку следните избори ќе бидат во редовен термин.
„Избори ќе има во 2024 година. Доста беа времињата кога во државата се правеа избори на две години. Владата има полн легимитет и мандат, посветена е на решавање на проблемите и справување со предизвиците пред граѓаните и државата“, изјави Ковачевски.
И шефот на дипломатијата Бујар Османи пред неколку дена на „Канал 5“ изјави дека парламентарни избори ќе има во мај 2024 година, заедно со претседателските. Како што рече тој, процениле дека предвремени избори не се во интерес на граѓаните и државата.
„Тоа треба да го тргнеме од маса и како можност за разговори“, рече Османи, потенцирајќи дека фокусот сега треба да се стави врз тоа како да се менаџира кризата. Според него, треба да изнајде начин со опозицијата да има базичен договор за справување со кризата.
За договор е потребен дијалог, а Мицкоски минатиот месец за ДВ изјави дека со премиерот Ковачевски досега немале никаков контакт.
Протестот на ВМРО-ДПМНЕ ќе се одржи во политички фреквентен период – една недела пред самитот на врвот на ЕУ и очекувањата на земјава за деблокада на бугарското вето. Тој процес е проследен со бројни критики од опозицијата за начинот на кој власта ги води разговорите со Софија, но и жестоки критики кон „дериватите“ настанати како резултат на нејзина ненавремена реакција или отсуство на реакција, вклучително и за „сарказмите“ на албанскиот премиер Еди Рама.
Тоа не е единствениот фронт во моментов. Вториот е насочен кон расправата за ребалансот на буџетот за 2022 година за кој од опозицијата велат дека „е директен доказ оти земјата е на раб од банкрот, економски разрушена и во која на дневна основа се зголемува сиромаштијата“.
Пратеничката група на ВМРО-ДПМНЕ и на коалицијата „Обнова на Македонија“ поднесе 174 амандмани, при чие креирање велат дека се раководеле од три приоритети: стимулирање на економијата преку капитални инвестиции кои се остварливи, помош на граѓаните и стопанството, и спречување на расипничкото трошење на парите од страна на власта. Меѓу позначајните се амандманите за намалување на акцизи и ДДВ за горива, ослободување од ДДВ за храна, како и финансиска поддршка за фотоволтаични и соларни системи за домаќинствата.
Извор: МИА
