Ова е голем ден за нашата света Македонска Православна Црква – Охридската Архиепископија, истакна лидерот на ВМРО-ДПМНЕ – Христијан Мицкоски, откако денеска српскиот патријарх Порфириј, на заедничката литургија во Соборниот храм во Скопје, соопшти дека СПЦ ја признава автокефалноста на МПЦ-ОА.
„Нашата црква мора да е обединета, нашиот Синод, свештеството, исто како што мора да биде обединет и нашиот народ, и тогаш сите искушенија, бури и премрежја ќе бидат премостливи. Да продолжиме да чекориме обединето“, порача Мицкоски.
Тој им честита на Синодот и неговото блаженство г.г. Стефан за, како што рече, „мудроста, обединетоста и достојноста… за градењето на мостови, за бранењето на нашиот идентитет и вредности во кои веруваме, за премостените децениски и вековни јазови“.
„По одлуката на Вселенската патријаршија, како и оваа денес, сведоци сме на историја важна за нашиот народ и нашата Македонија! Нека е за многу години!“, додаде Мицкоски.
