Поранешниот руски претседател Дмитриј Медведев, кој моментално е заменик претседател на рускиот Совет за безбедност, ги обвини САД дека прават планови за дестабилизација на Русија и скицираат сценарио кое води до нуклеарна војна.
По распадот на Советскиот сојуз, Русија стана цел на „примитивна војна“ во која Русија треба да биде „понижена, исолирана, потресена, поделена и уништена“, објави Медведев на Телеграм, пренесува ДПА.
„И сега да замислиме дека Америка ќе биде успешна во оваа рунда од конфронтацијата. Ова ќе биде резултатот: најголемата нуклеарна сила ќе биде под нестабилно политичко водство, со пропадната економија и максимален број нуклеарни бомби насочени кон цели во САД и Европа“, посочи Медведев.
Кина ќе биде следната жртва на САД, предвидува понатаму тој во објавата, додавајќи дека „и тогаш ќе бидеме на само неколку кратки чекори до најголемата глобална катастрофа – колапс во снабдувањето со енергија и храна, неуспех на сите колективни безбедносни системи и набргу потоа, голема нуклеарна експлозија“.
Односите меѓу Русија и САД се на најниска точка во светло на руската инвазија на Украина. САД, заедно со ЕУ и други земји, наметнаа широк спектар на санкции врз Москва.
МИА
