„Во разговорите во Софија денеска колку што знам нема никакви состаноци, но контактите продолжуваат постојано. Ние во целиот овој процес, особено во овие шест месеци сме имале секојдневни контакти на различни нивоа“, истакна вицепремиерот за европски прашања Бојан Маричиќ на денешната пре-конференција во Владата.
„Комплетирањето на овој предлог или на сите негови документи и досега се одвиваше преку Министерството за надворешни работи и мислам дека тие се во постојана комуникација со своите колеги од Софија. Но дека имало некаков процес денеска во Софија, јас немам таква информација“, рече Маричиќ одговарајќи на новинарско прашање дали денеска имало некакви преговори во Софија околу францускиот предлог.
Во однос на едностраната дипломатска нота или изјава на Бугарија, вицепремиерот потенцира дека не може да знае каква ќе биде формулацијата, бидејќи, како што рече, тоа е право на Бугарија, но што и да стои таму, уверува, ние на тоа секако дека ќе одговариме.
„Ние со Договорот од Преспа што го потпишавме со Грција во 2018 година, го ратификувавме во нашето Собрание, јасно го дефиниравме нашиот јазик како македонски. Врз основа на тој договор, бидејќи тој процес беше воден под покровителство и медијаторство на Обединетите нации, врз основа на тој договор го впишавме македонскиот јазик како наш јазик во Обединетите нации во нашата лична карта на ОН. Тоа имаше импликации во сите меѓународни организации, вклучувајќи и ОБСЕ, НАТО, секаде каде што сме членка.
Сите ние Македонците, но и сите граѓани, треба да сфатиме во овој процес нашата битка не беше да ја убедиме Бугарија да го смени ставот. Во овој процес на преговори, посочи тој, ние имавме за цел Европската унија да се постави кон нашиот јазик и идентитет принципиелно како што е поставена кон сите други држави членки“, истакна Маричиќ.
Граѓаните, порача, треба да бидат сигурни дека нашиот јазик и идентитет се заштитени и нема услови под кои би можеле да прифатиме било што друго. Тоа, додаде, Владата го потенцира уште од почетокот на разговорите.
Според Маричиќ, отпочнување на овој процес под овие услови (францускиот предлог) ќе ни овозможи и унапредување на нашата позиција и на отпочнување на процесот, отворање на врата која што ни беше затворена 17 години, и финализирање на овој процес со наше членство во Европската унија токму како Македонци кои говорат македонски јазик.
Но новинарско прашање за објавување на протоколот, Маричиќ истакна дека тој уште не е финализиран како документ и сѐ уште е предмет на разговори и затоа ќе биде споделен и на консултации и со јавноста тогаш кога ќе биде финализиран како документ.
„Ние сме свесни дека сите досега договори или компромиси кои што сме ги правеле се компромиси во кои што ние свесно сме учествувале, но кои што ни носат позитивни работи, а некои ни носат обврски кои што треба да ги исполниме. Но, на крајот, главна е целта – а тоа е да се отворат преговорите, да започнеме по 17 години со преговорите, да бидеме на масата каде што можеме да влијаеме, секако, што повеќе работи да зависат од нас и од тој процес да не остапиме ништо во она што не мислиме дека треба да се отстапи. Овој предлог тоа ни го гарантира и мислам дека никој нема основа за било каков страв, бидејќи одговорно разговаравме и го презентиравме“, заклучи Маричиќ.
Извор: МИА
