Вицепремиерот за европски прашања Бојан Маричиќ попладнево на седница за пратенички прашања во Собранието кажа дека државата, во моментот кога се случи инцидентот со Кристијан Пендиков од Охрид, изреагирала како што доликува на современа и демократска држава, а институциите дејствувале многу ефикасно изминатиот период.
„Правната постапка веќе е во одмината фаза, упасени се и двајцата сторители на овој случај, едниот Илија Спасески со бугарски пасош на кого му е одземен бугарскиот пасош, и така е пуштен после триесетдневниот притвор, вчера се предаде и лицето Б.А. од Битола, толку е објавено во јавноста, па толку можам да кажам, кое исто така е идентификувано како учесник во овој напад. Пред една недела ОЈО Охрид објави дека бара од Бугарија да се обезбеди можноста да биде испитан Пендиков за да може овој случај да се расчисти до крај и да ја видиме политичката позадина на целиот овој случај“, рече Маричиќ.
Според него, „не треба да се занемари фактот дека Пендиков бил активист на ВМРО-ДПМНЕ“.
„Имаме слики од него и изјави кои ги давал за медиумите за време на вашите протести кога ‘ја спасувавте Македонија’ од нас или од власта во 2017 година. Имаме изјави од Пендиков како не сака да чуе за Бугарија и дека само ВМРО-ДПМНЕ го интересира. Мислам дека ќе биде интересно за јавноста на крајот да не испадне дека и напаѓачите се ваши активисти и членови, а и овој нападнатиов е во најмала рака ваш поранешен член. Треба јавноста да ја знае политичката позади на овој инцидент, но тоа ќе им припадне на институциите да утврдат кои се мотивите за овој напад“, нагласи Маричиќ.
„Ние на нашите граѓани треба да им одговориме кој се обидува да внесе немир меѓу граѓаните“, додаде тој.
Според Маричиќ, Владата секогаш жестоко се спротивставувала на сите видови бугарски провокации, и порано и сега.
Извор: МИА
