Францускиот претседател Емануел Макрон оствари телефонски разговор со неговиот американски колега Доналд Трамп пред почетокот на вонредниот состанок на европските лидери во Париз посветен на ситуацијата во Украина. Сепак, од кабинетот на Макрон не открија детали од оваа комуникација. Во меѓувреме, водечките европски лидери веќе пристигнаа во Елисејската палата, објавија светските медиуми.
Меѓу првите кои пристигнаа беа британскиот премиер Кир Стармер и германскиот канцелар Олаф Шолц, кои беа пречекани од Макрон.
Францускиот претседател иницираше состанок со цел координација на одговорот на, како што го нарече, „американскиот дипломатски пристап кон Украина“.
Од претседателската резиденција во Франција соопштија дека состанокот ќе има неформален карактер, а учесници ќе бидат лидерите на Германија, Велика Британија, Италија, Полска, Шпанија, Холандија и Данска. Освен нив, ќе присуствуваат и претседателката на Европската комисија Урсула фон дер Лајен, како и генералниот секретар на НАТО, Марк Руте.
Германскиот канцелар Олаф Шолц, зборувајќи на еден од настаните во рамки на неговата предизборна кампања, истакна дека Украина мора да има моќна армија. Одговарајќи на новинарско прашање за можноста германските воени сили да учествуваат во идни мировни мисии во Украина, Шолц избегна директен одговор, но нагласи дека земјата е во чувствителна фаза поради претстојните парламентарни избори.
Полскиот премиер Доналд Туск, пак, пред почетокот на состанокот во Париз ги повика европските лидери на итно дејствување за зајакнување на одбраната на континентот. Тој посочи дека Европа во овој момент не поседува капацитет да се спротивстави на воената сила на Русија, при што ги повика земјите да преземат конкретни чекори.
– Доколку сакаме ефикасно да ѝ помогнеме на Украина, неопходно е веднаш да се фокусираме на сопствената одбранбена способност – изјави Туск непосредно пред да отпатува за Париз.
Во однос на подготвеноста за испраќање воени трупи во рамки на потенцијална мировна операција во Украина, засега три држави – Велика Британија, Германија и Шведска – отворено изразиле готовност да го сторат тоа.Од друга страна, САД испратиле прашалник до европските земји, барајќи проценка за нивната подготвеност да вложуваат во идната одбрана на Украина.
На самитот денеска ќе се дискутира за безбедноста на Европа и за актуелната ситуација со војната во Украина. Европските лидери изразуваат загриженост дека потенцијалната политика на Доналд Трамп би можела да доведе до изолација на долгогодишните американски сојузници.
Од американска страна, специјалниот пратеник на Трамп за Украина Кит Келог изјави дека, иако Европа нема да биде директно вклучена во преговорите за Украина, сепак нејзините претставници ќе имаат своја улога во процесот.
Во исто време, американскиот државен секретар Марко Рубио престојува во Ријад, каде оствари средба со саудискиот престолонаследник Мохамед бин Салман. Оваа средба е дел од неговата поширока дипломатска мисија на Блискиот Исток,а темата на разговорите ќе бидат идните чекори во обидите за постигнување мир во Украина,при што се очекува и средба со високи руски функционери.
