Во врска со смената на имињата на Македонски Брод и Македонска Каменица на новата мапа на Макпетрол, со соопштение одговорија од оваа компанија.
– Почитувани, во врска со наводите поврзани со мапата што Макпетрол АД Скопје ја дели на странските туристи на граничните премини Табановце и Богородица би сакале да ја информираме јавноста и нашите потрошувачи дека Макпетрол овластено ја превзема и користи наведената мапа таква каква што е од овластен картограф – изработувач на мапи. Од наша страна мапата е дополнета со симболи што се однесуват на местоположбата на нашите бензински станици на главните патни правци во земјата. При тоа останатите содржини на мапата не се менувани, односно сите топоними се оставени непроменети во својата изворна форма, се вели во објавата на Макпетрол преку Фејсбук.
Натаму во известувањето се додава:
– За жал, во процесот на техничката подготовка не сме забележале дека топонимите Македонски Брод и Македонска Каменица, во користената карта се наведени како Брод и Каменица без додавката македонски, најверојатно заради недостаток на простор. Се извинуваме за ненамерната техничка грешка и ја уверуваме јавноста и нашите потрошувачи дека при печатење на наредните изданија на мапата нема да дојде до вакви или слични технички пропусти. Со почит, „Макпетрол“ АД, се наведува во објавата.
