Лајвскрајб е “паметен” хемиски молив. Во моливот е вграден микрофон D/A и A/D конвертор и меморија, така што моливот може да се користи како диктафон. Снимките можат да се преслушаат преку вградениот звучник или преку слушалки, кои се приклучуваат преку стандарден џек од 3,5 mm. На моливот има и мал OLED екран преку кој се надгледува статусот на моливот.
Покрај ова, со моливот може да се меморира и текстот кој е напишан со него. Ова е можно само ако се пишува на нотесите кои се набавуваат од произведувачот на моливот. На нив е напечатена мрежа од ситни точки, кои се видливи само во инфрацрвена светлина. Корисниците можат да користат и обична хартија на која мрежата од ситни линии се печати на компјутерски печатач преку програмата која се испорачува заедно со моливот.
Моливот го “забележува” текстот преку малата инфрацрвена камера вградена на неговиот врв, а забележувањето почнува кога корисникот ќе покаже на соодветниот симбол нацртан на хартијата. Таа со помош на мрежата од точки го следи движењето на моливот по хартијата и така го рекреира напишаното.
Корисникот може да ги поврзе аудиозаписите снимени заедно со пишаниот текст и подоцна да ги репродуцира така што со моливот ќе “покаже” на соодветниот текст, било на хартијата на која е тој напишан било на компјутерскиот монитор кога текстот е префрлен во компјутерот. Покрај тоа, моливот може да извршува и различни апликации за кои командите се издаваат преку хартија. Една апликација која се испорачува со моливот е калкулаторот кој работи така што корисникот со моливот ќе “покаже” на копчињата на калкулаторот кој е нацртан на хартија, а резултатот се прикажува на екранот на моливот. Други апликации можат да се купат преку интернет-страницата на производителот.
Моливот на компјутер се поврзува преку USB кабел. Лајвскрајб смартпен се произведува во верзии со меморија од 4 и 8 гигабајти, а се продава по цена од 150 и 200 американски долари, соодветно за двата модела. Повеќе на адресата на производителот.
Оваа статија е преземена од списанието за наука и техника ЕМИТЕР
