Фудбалерите на Барселона ја прекинаа серијата од три натпревара без победа во Ла Лига, совладувајќи ја домашната Мајорка со 5:1 (1:1) во Палма во вторникот во натпреварот од 19. коло на шпанскиот шампионат.
Барселона поведе во 12. минута со голот на Феран Торес, а во 43. минута израмни Ведат Муриќи. Во вториот дел гостите ги „изметоа“ домаќините. Рафиња постигна два гола, во 56. од пенал и во 74. минута, а по еднаш мрежата ја погодија Френки де Јонг во 79. и Пау Виктор во 84. минута.
Барселона на тој начин ја постигна 12-та првенствена победа, но прва по точно еден месец. Каталонците сега имаат 37 бода, четири повеќе од второпласираниот Реал Мадрид, но „Кралскиот клуб“ има два натпревара помалку.
И Реал поради јануарското учество во шпанскиот Суперкуп во Саудиска Арабија однапред ќе го одигра натпреварот од 19. коло, а во среда гостува кај Атлетик во Билбао.
