„Христијан Мицкоски, загубен во своите деструкции и блокади, немајќи ништо друго да им понуди на граѓаните, реши да копира концепти и политики од СДСМ“, обвини денеска на прес-конференција портпаролот и пратеник на СДСМ – Костадин Костадинов.
Според него, „Македонија за сите луѓе“ на ВМРО-ДПМНЕ е бледа копија на „Живот за сите“ на СДСМ, а истото е случај и со концептот „Парите кај граѓаните“.
Костадинов обвини дека ВМРО-ДПМНЕ е партија која знае само да граба од граѓаните, да ги краде парите и да ги троши на непродуктивни и криминални проекти. Тој тврди дека не може партија која 11 години земала од граѓаните денеска да вели дека ќе ги враќа парите назад кај граѓаните.
„ВМРО-ДПМНЕ беше против укинување на радиодифузната такса и против воведувањето на дневна евтина тарифа на струјата. ВМРО-ДПМНЕ се противеше на проектот ‘Мој ДДВ’, а преку овој проект за две години вративме 36 милиони евра назад кај 400.000 граѓани“, истакна Костадинов.
Тој исто така наведе и конкретни чекори преку кои, според него и СДСМ, власта ги вратила парите кај граѓаните, притоа правејќи контраст со политиките на ВМРО-ДПМНЕ:
„Минималната плата е покачена од 9.000 денари, на 15.200 денари, просечната плата за само 4 години ја зголемивме за 6.000 денари. Да потсетиме, првите соработници на Мицкоски се противеа на зголемувањето на минималната плата.
Покачени се платите во сите сектори, во здравство, во образование, полиција, во армијата, во социјалната и детска заштита.
Пензиите во просек се зголемени за 2.000 денари за четири години. ВМРО-ДПМНЕ како власт не ги исплаќаше законските усогласувања, а како опозиција се противеше на зголемувањето на пензиите.
Социјалната помош е зголемена за 300%, а трајно е решен проблемот на 13.000 стечајни работници.
Во последниве година и половина, изгласавме шест пакети мерки кои Владата предводена од СДСМ ги креираше за спас на работните места, за враќање на парите кај граѓаните во вкупна вредност од 1.6 милијарди евра.
26.8 милиони евра завршија кај 309.000 граѓани кои добија платежни картички преку мерката ‘Купувам домашно’.
Преку мерката финансиска поддршка од 14.500 денари по вработен, со 79.5 милиони евра поддржани се околу 120.000 вработени граѓани“, истакна портпаролот на СДСМ, оценувајќи дека ваквите концепти кои вистински значат враќање пари назад кај граѓаните, им се непознати на ВМРО-ДПМНЕ и Мицкоски. Притоа, тој ѝ порача на опозицијата дека ако сака да враќа пари кај граѓаните, треба да почне од сопствените редови:
„Ако Мицкоски навистина сака да ги враќа парите кај граѓаните, воопшто нека не чека – нека почне во сопствената партија, преку враќање на парите што Груевски ги земал од членарините за да купува плацови на Водно.
ВМРО-ДПМНЕ веднаш да ги врати милионите за кои се обвинети функционери на партијата и за кои дел веќе има пресуди. Мицкоски веднаш со Груевски да ги врати од Белизе парите кај граѓаните.
Граѓаните гледаат кој враќа пари назад а кој граба и краде за да поставува споменици, палми и лажен барок за милионски провизии“, додаде Костадинов, порачувајќи дека таа разлика граѓаните ќе ја потврдат и на претстојните избори – одбирајќи СДСМ да го продолжи развојот и напредокот, а поразувајќи ги, уште еднаш, криминалните и деструктивни политики на ВМРО-ДПМНЕ и Мицкоски.
