Градоначалникот на Кавадарци и поранешен потпретседател на ВМРО-ДПМНЕ – Митко Јанчев, кој воедно и претендира да биде лидер на партијата, повика на протест против актуелниот претседател на ВМРО-ДПМНЕ – Христијан Мицкоски.
„Почитувани, Митко Јанчев, претендент за претседател на ВМРО-ДПМНЕ, повикува на мирен протест на 02 ноември 2020 година (понеделник) во 19 часот пред седиштето на ВМРО-ДПМНЕ (Белата палата)“, напиша Јанчев на својот Фејсбук профил. „Протестот е со една единствена цел, повикување за оставка на Христијан Мицковски“, додава тој.
Општинскиот Комитет на ВМРО-ДПМНЕ во Кавадарци, меѓутоа, експресно (и во целост) се огради од повикот на Јанчев.
„Наместо полноќни статуси на Јанчев сметаме дека местото за протест е онаму каде седи причината за сите проблеми на граѓаните, а тоа е Владата на Зоран Заев. Оттука ВМРО-ДПМНЕ, како партија која се бори против политиките на Зоран Заев кои нанесуваат штета на државата, очекува свој придонес во падот на оваа власт да даде и Митко Јанчев. За сите негови останати размисли ВМРО ДПМНЕ е демократска партија со легитимно избрано раководство и постојат начини и процедури тоа да биде дискутирано“, порачаа од ОК Кавадарци на својот Фејсбук профил.
Одговор за Јанчев стигна и од претседателот на новоформираниот Патриотскиот институт на партијата – Александар Пандов. Тој практично најави контра-протест на исто место и во исто време, порачувајќи му на Јанчев дека ќе го повика партиското членство за да ја искористи приликата да каже какво е нивното мислење за градоначалникот на Кавадарци:
„Мите Лимунада ги повикал вработените во неговата Кожувчанка во понеделник на протест пред штабот на ВМРО, Христо Татарчев.
Штета Мите, пред два дена бев во штабот на ОК Кавадарци, знаеш и сам колку многу луѓе имаше, требаше да дојдеш да ги споделиш со нас твоите визии и цели околу ВМРО и Македонија. Така носи редот, од дома се почнува Мите!
Што е тука е, па еве јас ќе ја искористам таа прилика на твое доаѓање во Скопје и ќе го повикам членството на ВМРО-ДПМНЕ да дојде во исто време и на исто место, па ние да ти го кажеме нашето мислење за тебе! Можеш и Вице да ни го донесеш. Ќе ве личи. А башка и на него имаме што да му кажеме. Таман вие после повторно заедно ќе си прославите. Ти текнува? Исто ко кога стана потпретседател на ВМРО-ДПМНЕ.
Или Мите, можеби најдобро е да излеземе двајцата на дебата на било која телевизија и да поразговараме за ВМРО и Република Македонија? Одважи се, биди маж, та нели лидер на ВМРО сакаш да бидеш!“, му порача Пандов.
