Најновите документи ја покажуваат комуникацијата на кампањата на Трамп со надворешни советници и сојузници, покривајќи различни теми пред изборите во 2024 година
Иранската хакерска група обвинета за кражба на мејловите на кампањата на републиканскиот претседателски кандидат Доналд Трамп, објави дел од украдените материјали откако не успеа да го привлече вниманието на големите медиуми, пишува Ројтерс.
Во последниве недели, хакерите почнаа пошироко да ги продаваат мејловите на Трамп на еден демократски политички оперативец, кој има објавено мноштво материјали на веб-страницата на неговиот комитет за политичка акција, American Muckrakers, како и на независни новинари, од кои барем еден ги објавил на платформата за пишување Substack.
Најновите документи ја покажуваат комуникацијата на кампањата на Трамп со надворешни советници и сојузници, покривајќи различни теми пред изборите во 2024 година.
Активностите на хакерите кои ги следел Ројтерс, откриваат редок преглед во операцијата за мешање во изборите, истовремено покажувајќи како Иран останува решен да влијае на изборите, и покрај обвинението на американското Министерство за правда во септември, кое ги товари за соработка со Техеран и користење на лажни идентитети.
Според обвинението, хакерска група поврзана со иранската влада, позната како Минт сандсторм или AПT42, компромитирала неколку членови на кампањата на Трамп помеѓу мај и јуни, крадејќи им ги лозинките. На брифингот претходно овој месец, Одделот за домашна безбедност предупреди дека хакерите сè уште ги таргетираат членовите на кампањата. Доколку бидат прогласени за виновни, им се закануваат затворски и парични казни.
Во обвинението на Министерството за правда се наведува дека тројцата ирански хакери се поврзани со Баси, паравоена сила која доброволно му помага на режимот да спроведе строги правила и да шири влијание.
„Роберт”
Зборувајќи за Ројтерс, хакерите кои го користат лажниот идентитет „Роберт“, не одговориле директно на американските обвинувања, а еден од нив рекол:
„Навистина очекуваш да ти одговорам?!“.
„Роберт“ е истата лажна личност наведена во обвинението на САД, според мејловите на ФБИ испратени до новинарите и прегледани од Ројтерс.
Иранската мисија во Обединетите нации соопшти дека извештаите за вмешаноста на земјата во хакирањето против изборите во САД се „целосно неосновани и апсолутно неприфатливи“ и категорично ги отфрли таквите наводи. ФБИ, кое ги истражува иранските хакерски активности насочени кон двете претседателски кампањи на овие избори, одбило да коментира.
Дејвид Вилер, основачот на American Muckrakers, рече дека документите што ги споделил се автентични и од јавен интерес. Вилер рече дека неговата цел била да „открие колку е очајна кампањата на Трамп да се обиде да победи“ и да ѝ обезбеди на јавноста фактички информации. Тој одби да разговара за потеклото на материјалот.
Иранците сметаат дека Трамп е одговорен за смртта на ирански генерал
Некои високи американски разузнавачки и безбедносни функционери рекоа дека напорите на Иран имаат за цел да го дискредитираат Трамп бидејќи го сметаат за одговорен за атентатот со беспилотни летала на поранешниот ирански генерал Касем Сулејмани во 2020 година.
На 6 септември, американскиот Muckrakers со седиште во Северна Каролина почна да објавува интерни мејлови од кампањата на Трамп. Вилер рече дека има нови информации што треба да ги објави наскоро и ќе продолжи да објавува слични документи се додека се автентични и релевантни.
