Иран ги отфрли обвинувањата од американскиот државен секретар Марко Рубио за наводни планови за атентати на американски политички лидери, вклучувајќи го и претседателот на САД. Иранските власти сметаат дека со овие тврдења, Вашингтон се обидува да одвлече вниманието од, како што велат, страдањата на иранските цивили.
Портпаролот на Министерството за надворешни работи на Иран, Есмаил Багаеи, на социјалната мрежа Икс објави видео со изјавите на Рубио, проследено со пораката: „Секое обвинување е признание“. Багаеи потенцира дека, глумејќи жртва, САД не можат да ги избегнат своите ужасни воени злосторства и злосторства против човештвото врз иранскиот народ.
Во видеото, Рубио тврди дека во САД веќе биле осудени луѓе поврзани со, како што вели, ирански агенти, кои подготвувале убиства на американски политички функционери на територијата на САД.
Како одговор на овие обвиненија, Багаеи потсети на настаните од актуелниот конфликт меѓу САД и Иран. Тој повторно го спомена ракетниот напад врз училиште во Минаб на 28 февруари, во кој, според иранските власти, загинале повеќе од 170 ученици, наставници и членови на персоналот. Оваа бројка досега не е независно потврдена, а Иран ја користи како еден од главните аргументи во обвинувањата против Вашингтон за напади врз цивилни цели за време на конфликтот.
