Во Тексас започна изградбата на првиот хотел во светот што се гради со помош на 3D печатач. Проектот, кој се реализира во пустинскиот дел на Тексас, користи огромен 3D принтер што слој по слој гради структури. Хотелот „Ел Космико“, кој веќе постои како хотел и камп на периферијата на Марфа, Тексас, сега се проширува со дополнителни 43 хотелски единици и 18 станбени куќи, сите изградени со технологија за 3D печатење.
Зад проектот стојат компанијата за 3D печатење ICON од Остин и архитектите од Bjarke Ingels Group. Изградбата вклучува употреба на големи 3D принтери, како што е Vulcan, кој е со височина од 4,7 метри и ширина од 14,2 метри и гради заоблени, беж ѕидови за новите хотелски единици. Принтерот користи специјален материјал наречен Lavacrete, цементна мешавина која е дизајнирана за издржливост и леснотија при печатењето.
Овој проект не само што ги истражува можностите на 3D технологијата во градежништвото, туку истовремено овозможува и уникатен архитектонски дизајн, кој со традиционалните методи би бил прескап за масовно производство. Првите две хотелски единици се веќе во изградба, а една од нив е трокреветна, додека другата е стандардна соба.
Технологијата овозможува прилагодување на материјалите според временските услови, при што времето и други фактори како влажноста и температурата играат улога во финалниот резултат. Ова е значајно, бидејќи 3D печатењето во иднина може да замени некои квалификувани работници, што ќе влијае на локалните економии и заедници.
Проширувањето на „Ел Космико“ се очекува да заврши до 2026 година, а цените за хотелските соби ќе бидат помеѓу 200 и 450 долари за ноќевање.
