Илон Маск, контроверзниот мултимилијардер и сопственик на Tesla, SpaceX и X (поранешен Twitter), наводно размислува за купување на англискиот фудбалски клуб Ливерпул. Според извори, Маск е подготвен да плати 7,2 милијарди евра за клубот од „Енфилд“, што би го зголемило неговото влијание во Обединетото Кралство. Ова го потврди и неговиот татко, Ерол Маск, во интервју за „Радио Тајмс“.
„Точно е дека Илон е заинтересиран за купување на Ливерпул, но тоа не значи дека одлуката е финализирана. Тој има емотивна поврзаност со градот, бидејќи баба му е родена таму, а семејството има долга историја со Ливерпул. Покрај тоа, Битлси, кои се светски икони, биле блиски со дел од нашето семејство,“ изјави Ерол Маск.
Идејата за купување на Ливерпул ја објави „Weekend Sport“, кој проценува дека предложената цена е помалку од два отсто од богатството на Маск, кое се проценува на околу 400 милијарди евра. Овој потег не би бил само поради љубовта кон спортот. Маск верува дека сопственоста на Ливерпул би му помогнала да ја зголеми својата политичка и деловна моќ во Велика Британија, што е во согласност со неговите растечки глобални амбиции.
Од 2010 година, Ливерпул е во сопственост на американската „Фенвеј спортс груп“ (FSG), која го купи клубот за 300 милиони фунти. FSG, исто така, поседува спортски тимови како Бостон Ред Сокс и Питсбург Пингвинс.
Дали Маск ќе го додаде Ливерпул на својата импресивна листа на инвестиции, останува да се види.
