Традиционално, и оваа година, АКУД „Мирче Ацев“ спроведе својот годишен концерт со впечатлива културно-уметничка програма. Вчера навечер, на сцената на Драмскиот театар во Скопје, пред бодра публика, беа изведени кореографиите „Долна Преспа“, „Малешевка“, „Тресеница“, „Жетварки“, „Надигранка“, „Пирин“ и многу други традиционални ора. Оваа манифестација уште еднаш ја потврди улогата на АКУД „Мирче Ацев“ како расадник на млади таленти кои се посветени на чувањето и негувањето на традицијата.
Настапите на игроорците, од најмладите до највозрасните, беа дополнети со забележителна изведба на оркестарот на друштвото, кој со традиционалните инструменти го обогати концертот. Особено впечатливи беа и неколкуте изведби на кавал, кои им создадоа топлина на многумина во публиката.
Настанот привлече големо внимание, што се забележа по преполната сала и по бурниот аплауз. Радува и фактот дека на сцената, како и во публиката, имаше многу млади, што е дополнителен доказ дека традицијата се сака, негува и пренесува на идните генерации. Ова укажува на продолжениот интерес на македонскиот народ за фолклорот и за зачувување на традицијата.
„Оваа вечер на нашите млади, на иднината што одиграна со синхронизирани чекори и звуци од прекрасниот оркестар, нè врати во минатото и ја оживеа традицијата. Срцата трепереа во единствен ритам, а љубовта продираше низ публиката,“ беа зборовите на присутните во Драмскиот театар.
Најмладите генерации ни покажуваат дека традицијата се негува и живее, преку фолклорот ја чуваме културата и корените. И покрај малата сцена, публиката си замина задоволна, полна со емоции што ќе останат со нив долго време.
