Јавниот институт за здравство на Франција вчера препорача Франција да ја одобри вакцината против COVID-19 на АстраЗенека. Меѓутоа, агенцијата препорача да не се употребува кај лица над 65 години.
„Податоците што моментално се достапни за луѓето на возраст од 65 години и повеќе се ограничени и не дозволуваат да се извлечат заклучоци за безбедноста и ефикасноста на вакцината кај оваа популација“, напишаа француските здравствени власти во резимето на препораките.
За луѓето од 65 години и постари, регулаторот препорача да се дава поинаков вид на вакцина против COVID-19, наречена гласник РНК вакцина. Ова е вид на вакцина направена од „Фајзер“ и „Модерна“.
За лица под 65 години, вакцината на АстраЗенека бара примање на две дози. Францускиот здравствен орган препорача втората доза да се дава девет до 12 недели по првата доза.
Портпаролот на здравствениот орган рече дека француската влада ќе донесе конечна одлука за тоа кој ќе ја прими вакцината и точните упатства за нејзина дистрибуција, пренесува „Си-Ен-Ен“.
Од КОВАКС информираат дека за Северна Македонија се предвидени помеѓу 103.200 и 175.200 дози од оваа вакцина
Вакцината на АстраЗенека, преку КОВАКС системот, во март пристигнува и кај нас
Министерството за здравство информираше дека КОВАКС системот преку допис ги соопштил деталите за првата испорака и типот на вакцината која ќе пристигне во нашата земја. Станува збор за вакцината AstraZeneca, од која првата количина за Северна Македонија е планирано да пристигне во март. Од КОВАКС информираат дека за Северна Македонија се предвидени помеѓу 103.200 и 175.200 дози од оваа вакцина, од кои околу 35% треба да пристигнат во првиот, а останатите во вториот квартал од годината, се вели во соопштението од МЗ.
