Претседателот на Република Турција – Реџеп Тајип Ердоган, изјави дека во минатомесечните разорни земјотреси што го погодија јужниот дел на земјата, повеќе од 214.000 згради се уништени или во голема мера оштетени, пренесува Анадолија.
„Во моментов е утврдено дека имаме 608.000 независни секции во 214.000 згради кои се урнати или се тешко оштетени и сите ќе бидат отстранети“, рече Ердоган на состанокот во Истанбул со високи турски претставници, вклучително и потпретседателот Фуат Октај, претседателот на парламентот Мустафа Шентоп, директорот за комуникации Фахретин Алтун и министри во Владата.
Ердоган, исто така, рече дека точниот број на згради и куќи што ќе бидат обновени во регионите погодени од земјотресот ќе се знае откако ќе се заврши проценката на штетите.
Тој истакна дека новите згради нема да бидат повеќе од три-четири ката и претежно ќе имаат трисобни станови.
„Нашата цел е да ги оживееме нашите градови, на начин што ќе ги одржува живи нашите историски и културни добра, но исто така, ќе ги зајакне против катастрофи“, рече Ердоган, додавајќи дека населбите ќе бидат преместени од рамни басени на ридско и поцврсто тло.
Повеќе од 45.000 луѓе загинаа како резултат на земјотресите што на 6 февруари ги погоди јужните региони на Турција. Станува збор за два земјотреси со јачина од 7.7 и 7.6 степени со епицентар во провинцијата Кахраманмарас, а во деновите потоа беа регистрирани околу 12.000 последователни потреси.
МИА
