Нема знаци за смислен напад врз Полска, изјави полскиот претседател Анджеј Дуда на денешната прес-конференција.
Дуда истакна дека проектилот што падна во Полска веројатно е истрелан од украинската противвоздушна одбрана. Се верува, рече полскиот претседател, дека се работи за стара ракета C-300 од советско производство. Москва, патем, денеска исто така ја идентификуваше ракетата како C-300.
Полскиот премиер Матеуш Моравјецки, пак, најави дека сега, откако стана јасно дека проектилот бил истрелан од украинската противвоздушна одбрана, може и да не се активира постапката од член 4 од Северноатлантскиот договор, кој предвидува консултации меѓу сојузниците во случај на закана.
Моравјецки додаде, меѓутоа, дека НАТО ќе распореди дополнителни средства за противвоздушна одбрана на територијата на Полска.
Извор: МИА
